ئیدارەی دۆنالد ترامپ لە ئەمریکا بۆ ماوەیەکی نادیار تیروپشکی گرین کارتی ڕاگرت کە مافی ژیان و کارکردن لەو وڵاتە دەدات. بڕیاری ڕاگرتنی پرۆگرامەکە کە بە پرۆگرامی ڤیزەی کۆچبەرانی هەمەچەشنی (DV) ناسراوە، بە فەرمی کەوتە بواری جێبەجێکردنەوە.

دەسەڵاتداران ئاماژەیان بەوەشکردووە، بڕیارەکە بەهۆی تۆمەتبارێکەوە بووە کە گوایە پەیوەندی بە تەقەکردنەکەی زانکۆی براون و کوشتنی پرۆفیسۆرێکەوە هەیە لە پەیمانگای تەکنەلۆژیای ماساشوستس.

کریستی نۆێم وەزیری ئاسایشی ناوخۆی ئەمریکا لە سۆشیال میدیا ڕایگەیاند کە خزمەتگوزاری ڕەگەزنامە و کۆچبەری ئەمریکا (USCIS)ی ڕاسپاردووە کە پرۆگرامی کارتی سەوز ڕابگرن.

نۆێم لە ڕاگەیاندنەکەیدا ڕایگەیاندووە کە کلۆدیۆ مانوێل نێڤێس ڤالێنتی ئەنجامدەری هێرشەکەی زانکۆی براون لە ساڵی ٢٠١٧ بە ڤیزەی هەمەچەشنی (DV1) هاتۆتە ئەمریکا و خاوەنی کارتی سەوز بووە.

نۆئێم وتی، "ئەم کەسە ترسناکە هەرگیز نەدەبوو لە وڵاتەکەماندا وەربگیرێت."(İLKHA)