Nûnerê taybet ê Serokê Emrîkayê Donald Trump, Steve Witkoff, li Berlînê bi Zelenskî û rêberên Ewropî re dicive, wekî beşek ji hevdîtinên ku armanca wan bidawîanîna şerê li Ukraynayê ye. Lêbelê, paytextên Ewropî berî destpêkirina danûstandinan ji Washingtonê garantiyên ewlehiyê yên zelal dixwazin.

Qesra Spî ragihand ku Steve Witkoff nûnerê taybet ê Serokê Emrîkayê Donald Trump, dê roja Duşemê li Berlînê bi Serokê Ukraynayê Volodîmîr Zelenskî û rêberên Ewropî re bicive. Rojeva sereke ya hevdîtinan dê danûstandinên aştiyê yên bi armanca bidawîanîna şerê li Ukraynayê be.

Di demekê de ku rêveberiya Amerîkî zextên dîplomatîk ji bo bidawîanîna şer zêde dike, welatên Ewropî û hikûmeta Kîevê "garantiyên ewlehiyê" yên berbiçav dixwazin, nemaze berî her danûstandinek potansiyel a li ser herêmên li rojhilatê Ukraynayê. Çavkaniyên ji Serokatiya Fransayê tekez dikin ku divê Washington helwestek zelal û girêdayî li ser vê mijarê bigire.

Li gorî Wall Street Journal, axaftinên telefonê yên dawî yên di navbera Trump û hinek rêberên Ewropî de aloz bûn. Hat îddîakirin ku Trump ji rêberên Ewropî xwestiye ku zextê li Zelenskî bikin da ku plana aştiyê qebûl bike. Lêbelê, Trump li Qesra Spî diyar kir ku dê di demek nêzîk de eşkere bibe ka gelo di navbera Rûsya û Ukraynayê de lihevkirinek dikare were kirin an na.

Tê texmînkirin ku Seroka Komîsyona Ewropayê Ursula von der Leyen û Sekreterê Giştî yê NATOyê Mark Rutte jî beşdarî civîna li Berlînê bibin. Beşdarbûna Serokkomarê Fransayê Emmanuel Macron hêna jî nehatiye piştrastkirin.

Karbidestên Fransî ji Emrîkayê ji bo "koalîsyonek ji alîyên dilxwaz" - ku tê texmînkirin ku ji dora 30 welatan pêk were - ku piştî agirbestek muhtemel li Ukraynayê were avakirin garantiyek zelal dixwazin. Li gorî Parîsê, ev garantî divê peyamek ji Moskowê re bişîne ku "êrîşek nû dê ne tenê bi Ukrayna û Ewropayê, lê di heman demê de bi Emrîkayê re jî rûbirûbûn be."

Ji aliyekî din ve, rêveberiya Kîevê pêşnûmeyek nûvekirî ya plana aştiyê ya 28 xalî ya ku Trump berê pêşkêş kiribû, pêşkêşî Washingtonê kiriye. Plan endametiya bilez a Ukraynayê di Yekîtiya Ewropayê de dihewîne. Li gorî çavkaniyek payebilind, tê texmînkirin ku Ukrayna di destpêka sala 2027an de tevlî YE bibe. Lêbelê, hinek welatên YE, bi taybetî Macaristan, li dijî vê pêvajoyê ne.

Lêbelê, Moskowê diyar kir ku ew ji nûvekirinên dawî yên derbarê plana Amerîkî de bêxeber e, û peyama ku danûstandin dê "rêyek dirêj û dijwar" be şand. Kremlinê ragihand ku ji têkiliyên dawî yên bi rêveberiya Trump re ti planeke nû pêşkêşî wan nehatiye kirin. (ÎLKHA)