Piştî ku wesayîteke leşkerî li Suweydayê ji teref dronekê ve hate hedefgirtin, hêzên ewlehîyê yên Sûrîyeyê agirbest wekî îxlalkirin îlan kirin û peyama "bersiveke tund" dan komên çekdar.

Hat ragihandin ku li parêzgeha Suweydayê ya li başûrê Sûrîyeyê wesayîteke leşkerî ji teref dronê ve hatiye xistin.

Kanala televîzyonê ya dewleta Sûrîyeyê el-Îxbariye ragihand ku êrîş li bajarokê el-Mezraayê pêk hatiye û droneke bi teqemeniyan wesayîteke hêzên ewlehiya navxweyî hedef girtiye.

Çavkaniyên ewlehiyê destnîşan kirin ku êrîş îxlalkirineke eşkere ya peymana agirbestê ya li herêmê ye, û ragihandin ku dê bersivek "biryardar û tund" li hember van kiryaran were dayîn. Daxuyaniyê komên çekdar ên li Suweydayê ji ber êrîşê sûcdar kirin.

Ji Tîrmehê vir ve li Suweydayê agirbestek nazik di meriyetê de ye. Piştî pevçûnên berê yên di navbera komên Durzî yên ku ji teref sîyonîstan ve têne piştgirî kirin û hêmanên eşîrî de, ku bi sedan kes mirin, ew agirbest aramiyek demkî anîbû. Lêbelê, carinan rageşiyên di navbera hikûmet û komên çekdar ên herêmî de dîsa zêde dibin.

Hikûmeta Şamê diyar kiriye ku di mehên dawî de gelek peymanên agirbestê ji bo Suweydayê hatine ragihandin, ku piraniya wan zû hilweşiyane.

Li gorî agahiyan, piştî êrîşa dawî hêzên ewlehiyê li dora parêzgehê tedbîrên xwe zêde kirine û ji bo pêşketinên nû yên muhtemel amadekariyan dikin. (ÎLKHA)