ئیبتیهال قەسام، نەوەی شەهید شێخ عیزەدین قەسام، لە کاردانەوە بە هەڕەشەکانی ئیتامار بن گەڤیر وەزیری توندڕەوی ئاسایشی ناوخۆی رژێمی سەهیۆنی بۆ تێکدانی مەزاری باپیرەی لە ناوچەی "بەلەد ئەلشێخ"ی سەر بە حەیفا، جەختی کردەوە کە ئەم هەڕەشانە دەربڕی ترسی قووڵی رژێمی داگیرکەرە لە پێگەی سیمبۆلیی شەهید عیزەدین قەسام.

بەپێی ڕاپۆرتی ناوەندی ڕاگەیاندنی فەلەستین، ئیبتیهال قەسام نەوەی شەهید شێخ عیزەدین قەسام وتی "رژێمی سەهیۆنی بەباشی دەزانێت کە کاریگەریی قەسام، لە کاتی شەهیدبوونیەوە نزیکەی ٩٠ ساڵ لەمەوبەر تا ئێستا بەردەوامە و هێشتا زیندووە. شەهید عیزەدین قەسام لە ڕێگەی بیری جیهادی بەردەوام کە بناغەی داناوە، زیندووە؛ بیرێک کە نەک تەنها لە فەلەستین بەڵکوو لە سەرانسەری وڵاتی شامدا پەرەی سەندووە."

ئەو هەڕەشەکانی بن گەڤیری بە نیشانەی لاوازی، ترس و تەنانەت نەخۆشیی دەروونی وەسف کرد و وتی ڕەفتارە هەڵەشە و توندڕەوانەکانی ئەو دەیسەلمێنێت کە پیاوانی هەڵقوڵاوی بیری قەسام، هێشتا گورزی قورس لە داگیرکەران دەوەشێنن.

نەوەی شێخ قەسام ڕوونی کردەوە، "ئێمە بۆ ڕزگارکردنی مەزاری ئەم موجاهیدە داوای هاوکاری ناکەین، بەڵکوو داوا لە ئازادیخوازانی جیهان دەکەین تا بۆ ڕزگارکردنی ڕۆڵەکان و خێزانی ئەو پیاوانەی کە ناو و بیری عیزەدین قەسام لە غەززە هەڵدەگرن، هەنگاو بنێن."

ناوبراو لە کۆتاییدا وتی، "ئەگەر شەهید عیزەدین قەسام ئەمڕۆ لە نێوانماندا بووایە، جەختی دەکردەوە کە نابێت قیبلەنما لە غەززە لابدرێت؛ غەززەیەک کە لە خوێندا نقوم بووە و ئێستا ڕۆڵەکانی لە ئاو، سەرما و برسێتیدا گیان دەسپێرن، بەبێ ئەوەی فریادڕەسێکیان هەبێت."(İLKHA)