لە ماوەی ٣١٥ ڕۆژی هێرشە بێ پچڕانەکاندا، ئاگاداری نوێی ڕووخاندن و هەڵکوتانی سیستماتیک و دەستبەسەرکردنی ئارەزوومەندانە لە جەنین و شارۆچکەکانی دەوروبەری چڕتر بووەتەوە و هەزاران خێزانی فەلەستینی ناچار کردووە ئاوارە بن.

هێرشەکانی رژێمی سەهیۆنی بۆ سەر شاری جەنین و کەمپی پەنابەرانی جەنین بۆ ٣١٥هەمین ڕۆژ بەردەوامە. لە کاتژمێرەکانی بەیانیەوە داگیرکەران کاری ڕووخاندن و هەڵکەندنی زیاتریان لە ناو کەمپەکەدا چڕتر کردووەتەوە و هەڵیانکوتایە سەر ماڵی ژمارەیەکی زۆر و کەلوپەلی خەڵکی مەدەنی فەلەستینی لەناوبردووە.

ئاگادارییەکانی ڕووخاندن بەسەر ژمارەیەکی زۆر لە شوێنی نیشتەجێبوون لە شارۆچکەی سیلا ئەلزوهر لە باشووری جەنین دابەشکرا. لەهەمان کاتدا چەند خێزانێکی دانیشتووی گەڕەکی جەبارییەت، لە دەوروبەری کەمپی جەنین، بە زۆر دەرکراون.

داگیرکەران دەستیان کردووە بە ڕووخاندنی ٢٤ شوێنی نیشتەجێبوونی دیکە لەناو کەمپەکەدا. وێرانکارییەکانی ناوچەکە ٤ هەزار خێزانی ناچارکردووە کۆچ بکەن، ئەمەش وایکردووە ڕووبەڕووی بارودۆخێکی مرۆیی ترسناک ببنەوە.

سیاسەتی چەوساندنەوە و هەراسانکردن لە شارۆچکە جۆراوجۆرەکانی پارێزگای جەنین بەردەوام بوو. لە کاتی هەڵکوتانە سەر شارۆچکەی قیباتیا، داگیرکەران گەنجێکیان گرت و یەکینەکانی پیادەیان بۆ سەر شەقامەکان بڵاوکردەوە و هاوڵاتیانی مەدەنییان دەستبەسەر و لێپرسینەوەیان لەگەڵدا کرد.

داگیرکەران کە لە شارۆچکەی یەعبەد نیشتەجێ بوون کە نزیکەی ٢٤ ڕۆژە گەمارۆ دراوە، بەردەوامن لە دەستبەسەرداگرتنی ماڵەکان لەو پێگە سەربازییانەی لەوێ دامەزراندوویانە. هاوکات لە هەڵمەتەکانی سەر گوندی بیر ئەلباشا ماڵەکان پشکنین و خەڵکی سڤیل لە سیلا ئەلحەریتیە بە بەکارهێنانی گازی فرمێسکڕێژ و بۆمبی دەنگی کرانە ئامانج.

لە سەرەتای دەستپێکردنی هێرشەکانەوە تا ئێستا زیاتر لە ٦٩ فەلەستینی لە جەنین و کەمپەکانی و شارۆچکەکانی دەوروبەری کوژراون. لە نێویاندا ٤ کەس بە تەقەی هێزە ئەمنییەکانی دەسەڵاتی فەلەستین کوژراون.(İLKHA)