ئەمڕۆ نەتانیاهۆ بەناو سەرۆک وەزیرانی رژێمی داگیرکەر بە فەرمی لە ئیسحاق هێرزۆگ، بەناو سەرۆکی ئەم رژێمە داوای کرد کە سەبارەت بە دۆسیە دادوەرییەکانی دژی، لێی خۆش بێت.

بنیامین نەتەنیاهوو لەم داواکارییەیدا، نە دانی بە تاوانەکەیدا ناوە و نە داوای لێبووردنی کردووە.

نووسینگەی هێرزۆگ لە کاردانەوەدا بەرامبەر ئەم داواکارییە، بە نائاسایی وەسفی کردووە؛ چونکە داوای لێخۆشبوون و بەخشین بەزۆری لە دوای دەرچوونی بڕیاری کۆتایی دادگا و داننان بە تاوان و هەڵەکاندا دەکرێت.

نەتانیاهوو لە زیاتر لە دوو دۆسیەدا بە هاوڕێیەتیی خێزانەکەی، تۆمەتبارە بە وەرگرتنی بەرتیل، خراپ بەکارهێنانی دەسەڵات و واستەکاری.

هەفتەی ڕابردوو دۆنالد ترامپ لە تۆڕە کۆمەڵایەتییە تایبەتەکەی خۆیدا نووسیی کە کاتی ئەوەیە "بی بی" (نازناوێک بۆ نەتانیاهۆ لە خاکی داگیرکراودا) بەر لێخۆشبوون بکەوێت.

سەرۆکی ئەمریکا دۆسیە دادوەرییەکانی دژی نەتانیاهۆی بە نادادپەروەرانە و سیاسی زانیبوو.

ئیلی کۆهین، بەناو وەزیری وزەی رژێمی داگیرکەر لە دوای داواکاریی فەرمیی لێخۆشبوونی نەتانیاهۆ لە سەرۆکایەتیی ئەم رژێمە، ڕایگەیاند کە لە بەرژەوەندیی حکوومەتدایە دادگاییەکەی سەرۆک وەزیران کۆتایی پێ بێت. ناوبراو وتی باشتر وایە ئیسحاق هێرزۆگ، داواکارییەکەی نەتانیاهۆ قبوڵ بکات.

بەپێی ڕاپۆرتی میدیا عیبرییەکان، داواکارییەکەی نەتانیاهۆ ١١١ پەڕەیە.

هەروەها میدیا عیبرییەکان هەنگاوەکەی نەتانیاهۆ بۆ پێشکەشکردنی داوای لێخۆشبوون بە هێرزۆگ، بە "رووداوێکی گەورە و گرنگ" وەسف کرد.

بەپێی شیکاریی ئەم میدیایانە، ئەم بڕیارە "بوومەلەرزەیەکی یاسایی" دروست دەکات و دەبێتە وەرچەرخانێکی بنەڕەتی لە گۆڕەپانی سیاسیی داهاتوودا.

ئەم هەنگاوە هەروەها نیشاندەری توندتربوونی بازنەی گوشارە لەسەر نەتانیاهۆ هەستکردنیەتی بە نزیکبوونەوەی هەڵبژاردنەکان.(İLKHA)