بزووتنەوەی حەماس لە بەیاننامەیەکی ڕۆژنامەوانیدا، ئامادەبوونی بەناو وەزیری توندڕەوی ئاسایشی ناوخۆی رژێمی داگیرکەر ئیتمار بن گڤیر، لە ناوچەی نەقەب و هەنگاوی تاکەکەسیی ئەو بۆ گەیاندنی فەرمانی ڕووخاندن و چۆڵکردن بە خێزانە بەدەوییەکانی ناوچەکە، بە "بەرجەستەبوونی ئاشکرای تیرۆری ڕێکخراو و ستەمکارانە" وەسف کرد.

بزووتنەوەکە لە بەیاننامەکەیدا، ڕێبازی حکومەتی داگیرکەری بە "پشتیوانیکاری توندڕەوی و سەرکوت بە هەموو شێوەکانییەوە" وەسف کرد.

حەماس جەختی لەوە کردەوە کە "خۆنواندنی هێزی داگیرکەران لە بەرامبەر کۆمەڵگە مەدەنییە بەدەوییەکان، فشارخستنەسەریان و هەڕەشەلێکردنیان بۆ لەدەستدانی پەناگەکانیان، ئەڵقەیەکە لە زنجیرەی ئازاردانی سیستماتیک و جیاکاریی ڕەگەزپەرستانە و لۆژیکی هاندان و ستەمکاری بەبێ هیچ پێوەرێکی یاسایی یان ئەخلاقی بەهێز دەکات."

بزووتنەوەکە هۆشداریی دا کە "بەردەوامیی ڕێبازی سەرکوتکەرانە و فاشیستیی حکومەتی داگیرکەر، دەرئەنجامی مەیدانیی مەترسیدارتری لێدەکەوێتەوە."

حەماس داوای لە کۆمەڵگەی نێودەوڵەتی و ڕێکخراوەکانی مافی مرۆڤ کرد "بەپەلە دەستوەردان بکەن و ڕێگری لە داگیرکەران بکەن لە بەردەوامیدان بە پلانەکانیان بۆ ڕووخاندن و ئاوارەکردن."

بزووتنەوەکە هەروەها بانگەوازی ئاراستەی گشتیی خەڵک و دامەزراوە خۆجێی و نیشتمانییەکان کرد بۆ "هاوپشتیی بەپەلە لەگەڵ دانیشتووانی بەدەوی لە نەقەب و سەرجەم ئەو ناوچانەی کە بەهۆی سیاسەتەکانی داگیرکەرانەوە زیانیان بەرکەوتووە"، و داوای "زیادکردنی هەنگاوە جەماوەری و یاساییەکانی کرد بۆ بەرەنگاربوونەوەی هەوڵەکانی ئاوارەکردنی زۆرەملێ."

لە کۆتایی بەیاننامەکەی حەماسدا هاتووە، "خۆڕاگری و پشوودرێژیی گەلەکەمان، بەربەستێکی پتەوە لە بەرامبەر سەرجەم پلانە پیسەکانی داگیرکەران."(İLKHA)