سەرۆک کۆماری ئێران لە گفتوگۆی تایبەت جەختی کرد کە تاران بۆ هەر جۆرە هێرشێکی سەربازی رژێمی داگیرکەر ئامادەیە و هێزەکانی ئێران ئامادەن تا دووبارە هێرش بکەنە سەر قووڵایی خاکە داگیرکراوەکان.

مەسعوود پزشکیان سەرۆک کۆماری ئێران لە گفتوگۆی تایبەت لەگەڵ کەناڵی تەلەڤیزیۆنی ئەلجەزیرە جەختی کرد کە هێزەکانی ئەو وڵاتە ئامادەن تا جارێکی دیکە هێرش بکەنە سەر قووڵایی خاکە داگیرکراوەکان.

پزشکیان وتی، "ئێمە بۆ هەر جۆرە هێرشێکی ئیسرائیل ئامادەین و هێزەکانی ئێمە ئامادەن تا دووبارە هێرش بکەنە سەر قووڵایی خاکی ئیسرائیل. ئیسرائیل خەساری لە ئێمە داوە و ئێمە بە هێزەوە گورزمان لە ئەوان داوە، بەڵام خەسارەکانیان دەشارنەوە."

هەروەها وتی، "ئیسرائیل؛ بەدوای گۆڕان، دابەش کردن و لەناوبردنی ئێران لە ڕێگای دروست کردنی ئاژاوە و لەناوبردنی حکومەت بوو، بەڵام شکستی هێنا. گومانی تێدا نییە کە دزە کراوەتە نێو ئێرانەوە بەڵام هۆکاری سەرەکی تەکنۆلۆژیای ئەمریکی و بەکارهێنانی تواناییەکانی ئەوان بوو."

پزشکیان ئاماژەی بەوە کرد کە کۆماری ئیسلامی ئێران دژی چەکی ئەتۆمییە و وتی، "ئەوە هەڵوێستی سیاسی، ئایینی، مرۆیی و ستراتیژیکی ئێمەیە. پیتاندنی یۆرانیۆم لە خاکی ئێمە لە داهاتوودا لە چوارچێوەی یاسا نێودەوڵەتییەکان درێژەی دەبێت."

هەروەها وتی، "هەر جۆرە دانوستانێک لە داهاتوودا دەبێت لەسەر بنەمای براوە- براوە بێت و ئێمە هەڕەشە و فەرمان قبووڵ ناکەین. ئێمە لەبەر بیری خۆمان قسەی ترامپ لەسەر ئەوەی کە چەکی ئەتۆمی نابێت هەبێت قبووڵ دەکەین بەڵام باس لەسەر وەلانانی بەرنامەی ئەتۆمی، نا."

پزشکیان هەروەها ئاماژەی دایە سەر هەوڵ بۆ تیرۆر کردنیشی وتی، "ئەو ڕووداوە بەشێک لە هەوڵەکانی ئیسرائیل بۆ تیرۆری ڕێبەرانی سیاسی دوای ڕێىەرانی سەربازییە."(İLKHA)