Şewata daristanê ya ku doh piştî nîvro li navçeya Şarkoy a Tekîrdaxê dest pê kir, di bin tesîra bayê de bi lez belav bû û gihîşt devera gundewarî ya Kavakkoy a navçeya Gelibolu ya Çanakkaleyê. Sedema şewatê hêna jî nehatiye diyarkirin.

Şewata daristanê ya li navçeya Şarkoyê ya Tekîrdaxê derket û ber bi navçeya Gelibolu ya Çanakkaleyê ve belav bû, tê mudaxelekirin.

Di dema ku agir pê ket de, germahiya hewayê 32 pile Celsius (92 pile Fahrenheit) û leza bayê 46 kîlometre di saetê de (26 mîl di saetê de) bû. Di bin van şert û mercan de, agir zû dest bi tehdîda taxên Şenkoy, Kocaali û Kızılcaterzi kir. Li van deveran di bin koordînasyona AFADê de valakirin pêk hat. Hinek xanî û embar zirar dîtin, û niştecihan hewl dan ku heywanên xwe bibin cihekî ewle.

6 balafir, 6 helîkopter, 60 kamyonên avê û 350 personel bi hev re kar kirin û hewlên sarkirinê tevahiya şevê berdewam kirin.

Walîyê Çanakkaleyê Omer Toraman diyar kir ku şewat ji bo boriyên gaza xwezayî an jî tesîsên leşkerî talûkeyek çênekiriye.

Wî diyar kir ku tê texmînkirin ku agir bi destwerdana balafiran di saetên sibehê de bê kontrolkirin.

Parêzgariya Tekîrdaxê li ser medyaya civakî bang li welatiyan kir ku ji nêzîkbûna herêma şewatê dûr bisekinin û goh bidin hişyariyên rayedaran.

Ji bo pêşîgirtina belavbûna agir ji parêzgehên derdorê hêzên ewlehiyê hatin şandin. Li deverên bandordar qutbûna elektrîkê berdewam dike û hêzên ewlehiyê piştgiriyê didin hewldanên valakirin û vemirandina agir. (ÎLKHA)