Serokê Têkiliyên Derve yê HUDA PARê Huseyîn Îmîr di derbarê pevçûna navxweyî ya li Yemenê de daxuyaniyek da û diyar kir ku divê welatên herêmê li şûna ku di şerê navxweyî yê di navbera Misilmanan de alî bigirin, ji bo aştiyê înîsiyatîf bigirin û daxwaza agirbestek mayînde û rakirina dorpêçê kir.

Serokê Têkiliyên Derve yê HUDA PARê Huseyîn Îmîr derbarê pevçûnên demdirêj ên li Yemenê de ku di demên dawî de zêde bûne daxuyaniyek nivîskî weşand.

Îmîr diyar kir ku ew bi fikar û xemgîniyeke mezin parçebûn û pevçûnên navxweyî yên li Yemenê dişopînin û destnîşan kir ku geşedanên dawî yên li vê herêma ku bûye navenda krîzên mirovî û xizaniyê, krîz gihandiye astek hîn bêhntengtir.

Îmîr, destnîşan kir ku encamên wêranker ên ku îro gelê Yemenê pê re rû bi rû ye, encama polîtîkayên ambargo û dorpêçkirinê yên bi salan in û got, "Mixabin gelê Yemenê, ku ji pêdiviyên bingehîn ên mirovan bêpar e û bi birçîbûn û nexweşiyan re têdikoşe, di bin lepên wesayeta derve de ye. Aştîya Yemenê bi rûniştina alîyên nakok li ser heman maseyê, bê wesayeta derve û gihîştina lihevkirinekê ji bo aştî û pêşeroja gel ve girêdayî ye."

"Divê hevpeyman li dijî rejîma sîyonîst bibin yek, ne di şerê birakujiyê de"

Îmîr tekez kir ku daxuyaniyên derbarê beşdarbûna Hevpeymaniya Mekkeyê di şerê Yemenê de nîgeran in û got, "Rêxistineke ku armanca wê xurtkirina hevkariya sîyasî, aborî û leşkerî ya di navbera welatên herêmê de li dijî hêzên derve ye, bi cihanîna aliyekî di şerê navxweyî yê di navbera Misilmanan de, ew ê beşdarî aştî û aramîya herêmê nebe. Divê welatên herêmê bi hevpeymanên ku di navbera xwe de çêkirine, li dijî rejîma sîyonîst û hêzên emperyalîst ên piştgir ên wê, ku li erdnîgariya me xwînê dirijînin û astengîya aramîya herêmê dikin, bibin yek. Di vê şerê birakujiyê de, ku Yemen, yek ji welatên herî xizan ên cîhanê ye, bedelên giran dide, divê hewldanên tevlîkirina hevpeymanan ji bo gurkirina pevçûnan li şûna pêşxistina lihevhatinê werin astengkirin."

"Divê agirbestek mayînde were damezrandin û dorpêça heyî tavilê were rakirin"

Îmîr diyar kir ku divê aktorên herêmî ji bo aştiyê însiyatîf bigirin, ne ku di pevçûnên li cîhana Îslamê de şer gur bikin û daxuyaniya xwe bi van gotinan bi dawî kir:

"Tiştê ku di vê merhaleyê de divê were kirin ne gurkirina şer e, lê destpêkirina hewldanek lihevhatinê ya berfireh e da ku yekparçeyiya sîyasî û erdnîgarî ya Yemenê were garantîkirin û alî li ser maseya danûstandinan werin cem hev da ku pevçûna birakujiyê bi dawî bibe. Aktorên herêmî divê ji bo bidestxistina aştiyê di nakokiyên li cîhana Îslamê de, li şûna ku bibin aliyên pevçûnan, însiyatîf bigirin. Di vê çarçoveyê de, divê agirbestek mayînde were damezrandin da ku şerê navxweyî li Yemenê bi dawî bibe, û dorpêça heyî divê tavilê were rakirin." (ÎLKHA)