HAMASê tekez kir ku dawiya Yaser Ebû Şebab aqûbeta neçarî ya her kesê ku dixwaze bi îşxalkeran re hevkariyê bike ye, û diyar kir ku helwesta civaka Filistînê li dijî xayînan eşkere û bi biryar e.

Di daxuyaniyekê de ku roja Pêncşemê hate weşandin, Hamasê ragihand ku aqûbeta Yaser Ebû Şebab "encamek neçar" e ji bo hemû kesên ku xiyanet li gelê xwe kirin û xwe kirin amûrên rejîma sîyonîst. Tevgerê tekez kir ku sûcên ku ji hêla Ebû Şebab û koma wî ve hatine kirin bi tevahî li dijî nirxên neteweyî û civakî ne.

Di daxuyaniyê de, HAMASê malbat, eşîr û qebîleyên Filistînî ji ber dûrketina ji Ebû Şebab û hemî hêmanên ku bi îşxalkeran re hevkariyê dikin pesnê wan da û diyar kir ku van koman di civakê de ti nirxek temsîlî nînin.

HAMASê destnîşan kir ku rejîma sîyonîst ji bo pêkanîna projeyên xwe li Xezzeyê xwe dispêre "komên neqanûnî û ji hêla civakî û exlaqî ve xirabbûyî" nîşana bêçaretiya wê ye ji ber ku ew nekariye berxwedana gel bişkîne.

Di daxuyaniyê de wiha hat gotin, "Her çend îşxalker nikaribin hevkarên xwe jî biparêzin jî, divê kesê ku xiyanetê li gelê xwe dike li bendê nebe ku parastinê bibîne. Dawiya vê rêyê ew e ku meriv bikeve çopxaneya dîrokê."

HAMASê diyar kir ku ew ê li dijî hemû hewldanên ku tevna civakî ya gelê Filistînê bi tevahî, tevî malbat, eşîr û saziyên wan ên neteweyî hedef digirin, derkeve û tekez kir ku tu avahî an projeyek derveyî nikare li ser vê bingeha yekîtîyê cîh bibîne.

Di heman demê de, medyaya îşxalker ragihand ku Yaser Ebû Şebab li herêma Refahê ji teref komeke çekdar a nenas ve hatiye kuştin. Li gorî medyaya îşxalker, Ebû Şebab birine Nexweşxaneya Soroka ku nexweşxaneyeke siyonîst e, û li wir bi birînên giran mir. (ÎLKHA)