دۆنالد ترامپ، سەرۆکی ئەمریکا ڕایگەیاند، چەکی نوێی ئێرانیان لە گەرووی هورمز لەناوبردووە و ڕایگەیاند، ئامادەن جارێکی دیکە هێرش بکەنە سەر ئێران.

ترامپ لە کۆشکی سپی بۆ ڕۆژنامەنووسان قسەی کرد سەبارەت بەو هێرشانەی شەوی ١ی ئۆکتۆبەر بۆ سەر ئێران ئەنجامیان دا.

ترامپ ئیدیعای کرد کە ئێران "هەموو ئەو کەرەستە نوێیانەی لابردووە کە هەوڵی دروستکردنیان دەدا لە گەرووی هورمز، بەشێکیان بەرگری و هەندێکیشیان هێرشبەرانە"، ئاماژەی بەوەشکرد، ئێران "هەوڵدەدات ڕادار و ناوەندەکانی هەڵدانی مووشەک دروستبکاتەوە".

دۆنالد ترامپ وتی، "ئەوان ئەمانەیان دروست دەکرد و خەریک بوو تەواو ببن، بۆیە ئێمە لەناومان برد."

ترامپ وتی، "شەوی ڕابردوو گورزێکی زۆر سەختمان لە ئێران دا، هەرکاتێک ویستمان ئامادەین دووبارە ئەو کارە بکەینەوە"، هەروەها بۆچوونی خۆی دەربڕی کە هێرشە سەربازییەکانی ئەمریکا بۆ سەر ئێران "زۆر ناخایەنێت".

ترامپ لە وەڵامی پرسیارێکدا سەبارەت بەوەی کە بیرۆکەی گۆڕینی ناوی گەرووی هورمز چەندە بە جددی وەردەگرێت، وتی "تەنها لە ڕێگادا باسم لەوە کردووە". پێشتر کۆشکی سپی نەخشەیەکی لەسەر پلاتفۆرمی ئێکس بڵاوکردبووەوە کە گەرووی هورموز بە "گەرووی ترامپ" نیشان دەدا.

ترامپ پێشتر لە تۆڕی کۆمەڵایەتی ڕاستی نووسیبووی کە بیر لە گۆڕینی ناوی گەرووەکە دەکاتەوە بە ناوی خۆیەوە.

فەرماندەیی ناوەندی ئەمریکا پێشتر ڕایگەیاندبوو کە زنجیرەیەک هێرشیان بۆ سەر ئامانجەکان لە ئێران ئەنجام داوە. بەپێی ڕاپۆرتی پرێس تیڤی، تەقینەوەکان لە کەناراوەکانی باشووری وڵات و لە دوورگەی قشم و لە چەند شارێک ڕوویانداوە.

محەممەد ڕەزا زەفەرغەندی وەزیری تەندروستی ئێران ڕایگەیاند، ژمارەی کوژراوانی هێرشە ئاسمانییەکانی ئەم دواییەی ئەمریکا بۆ سەر ئێران گەیشتووەتە ١٨ کەس و ١٠٨ کەسیش برینداربوون.(İLKHA)