ئیسماعیل بەقایی وتەبێژی وەزارەتی دەرەوەی ئێران ڕایگەیاند، شاندی باڵای نزیکەی ١٠٠ وڵات لە ڕێوڕەسمی ماڵئاوایی و پرسەی عەلی خامنەیی ڕێبەری شەهیدی ئێران بەشداری دەکەن.

بەقایی، لە بەیاننامەیەکدا بۆ میدیاکانی ئێران، وردەکارییەکانی سەبارەت بە ڕێوڕەسمی ماڵئاوایی کە بڕیارە بۆ تەرمی خامنەیی بەڕێوەبچێت، کە دەوڵەتمەدارانی بیانی و شاندە نێودەوڵەتییەکان بەشداریی تێدا دەکەن، بڵاوکردەوە.

بەقایی ئاماژەی بەوەدا کە شاندی باڵای ١٠٠ وڵات بەشداری دەکەن و ئاماژەی بەوەشکرد، "میوانەکان بریتی دەبن لە سەرۆکی دەوڵەتان، سەرۆکی پەرلەمان، وەزیرانی دەرەوە، نوێنەری تایبەتی حکومەتەکان، کەسایەتییە سیاسییەکان، هەروەها ژمارەیەکی زۆر لە نوێنەری گشتی و گروپە مەدەنییەکان."

بەقایی ڕایگەیاند، "ڕێوڕەسمی ماڵئاوایی و پرسەی ڕێبەری شەهیدی شۆڕشی ئیسلامی نەک تەنیا بۆ نەتەوەی ئێران، بەڵکو بۆ گەلانی ناوچەکە و موسڵمانان و هەموو خەڵکی ئازادی جیهان، رووداوێکی مێژوویی و لە ڕادەبەدەر گرنگە. ئێمە میوانداری ژمارەیەکی زۆر لە بەرپرسان و کەسایەتییە سیاسییەکان و نوێنەرانی گەل دەکەین بۆ بەشداریکردن لە ڕێوڕەسمەکاندا."

بەقایی ڕایگەیاند کە مەراسیمەکە بەیانی ئەمڕۆ کاتژمێر ٨:٠٠ بە کاتی ناوخۆ بە ساتێک بێدەنگی و ماڵئاوایی دەستیپێکردووە کە ژمارەیەکی زۆر لە کەسایەتییە سیاسییەکان و نوێنەری گشتی ئامادەبوون، ئاماژەی بەوەشکرد، بەرپرسانی پلە باڵا و کەسایەتییە سیاسییەکانی وڵاتانی دیکەش بە درێژایی ڕۆژەکە بەشداری مەراسیمەکە دەکەن.

بەپێی میدیاکانی ئێران، خشتەی ڕێوڕەسمی ماڵئاوایی و پرسە و ناشتنی خامنەیی و ئەندامانی بنەماڵەکەی بەم شێوەیەیە:

٤-٥ی تەمووزی ٢٠٢٦ (شەممە-یەکشەممە): ڕێوڕەسمی ماڵئاوایی لە مزگەوتی ئیمام خومەینی لە تاران.

٦ی تەمووزی ٢٠٢٦ (دووشەممە): ڕێوڕەسمی پرسە لە تاران.

٧ی تەمموزی ٢٠٢٦ (سێشەممە): ڕێوڕەسمی پرسە لە شاری قوم.

٩ی تەمموزی ٢٠٢٦ (پێنجشەممە): ڕێوڕەسمی پرسە و ناشتنی لە مەزاری ئیمام ڕەزا لە مەشهەد بەڕێوەدەچێت.

ڕۆژی ٢٨ی شوبات، ئایەتوڵڵا سەید عەلی خامنەیی، لەگەڵ کەسانی دیکە و بەشێک لە ئەندامانی بنەماڵە، لە ئەنجامی هێرشێک کە لەلایەن ئەمریکا و رژیمی داگیرکەری سەهیۆنیەوە ئەنجام درا، شەهید بوون.(İLKHA)