تەیسیر سلێمان بەرپرسی بزووتنەوەی حەماس کاردانەوەی بەرامبەر ئەو کەسانە دەربڕی کە بزووتنەوە و بەرخۆدان بە هۆکاری کوژراوەکانی غەززە دەزانن و وتی، "ئەگەر بەرخۆدان تەسلیم بێت لەوانەیە بتوانن خواردن بخۆن، بەڵام سەریان دەبڕدرێت! ئامانجی ئیسرائیل ئەوەیە: ئەگەر ناتوانی بەرخۆدان تێکبدەیت، گەلەکەیان بکوژن. لەڕێگەی برسێتی و گەمارۆوە بیهێننە سەر ئەژنۆیان."

تەیسیر سلێمان بەرپرسی بزووتنەوەی حەماس لە لێدوانەکەیدا بۆ کەناڵی ئەلجەزیرە کاردانەوەی نیشاندا بەرامبەر بە داواکاری بەرپرسانی رژیمی داگیرکەر کە حەماس دەستبەرداری هەموو داواکارییەکانی بێت و تەسلیمی داخوازییەکانی داگیرکەران بێت.

ناوبراو وتی، "ڕاستییەکە ئەوەیە کە سمۆتریش، بن گڤیر، نەتانیاهۆ، کاتز، حکومەتی ڕاستڕەوی ئیسرائیل و تەنانەت زۆرێک لە کەسایەتییە ئۆپۆزسیۆنەکان، پێیان وایە خوێنی فەلەستینییەکان ڕەوایە، دەبێت فەلەستینییەکان بکوژرێن و دەستگیربکرێن و لە وڵاتەکە دەربکرێن."

سلێمان جەختی لەوە کردەوە کە تاکە ڕێگە بۆ ئازادکردنی دیلەکان لە بەرخۆدان هەنگاوەکانی وەک "ئازادکردنی دیلەکانی بەرخۆدان و کۆتایی هێنان بە شەڕ و کشانەوە لە غەززە و هێنانی هاوکاریە" و ئاماژەی بەوەدا کە سوپای داگیرکەر تا ئێستا هیچ کام لە ئامانجەکانی لە غەززە بەدی نەهێناوە و بەدەستیان ناهێنێت.

کاتێک پرسیار لە سلێمان کرا کە ئایا حەماس بەرپرسیارە لە مردن و برسێتی لە غەززە، وتی، "گەلەکەمان لە غەززە مافی خۆیەتی هەرچییەک بڵێت، ئەوان نەک تەنها بۆ ئێمە، بەڵکو بۆ جیهان دەتوانن بیڵێن. بەڵام ئەمەیش هەیە: ئەگەر بەرخۆدان تەسلیم بێت، ڕەنگە بتوانن خواردن بخۆن، بەڵام سەریان دەبڕدرێت. ئەمە ئامانجی ئیسرائیلە. ستراتیژی سەربازییان ئەمەیە: ئەگەر ناتوانی بەرخۆدان بشکێنی، گەلەکەیان بکوژە. ژینگەی کۆمەڵایەتی تێک بدەن. لە ڕێگەی برسێتی و گەمارۆوە بیانهێننە سەر ئەژنۆ. فاشیستەکان لە لیبیا و نازییەکان لە ڕووسیا ئەم شێوازەیان بەکارهێنا.

ڕاستییەکی تریش هەیە: ئەگەر بەرخۆدان نەبووایە، دەکرا باسی دۆخێکی هاوشێوەی ساڵی ١٩٤٨مان بکردایە: وێرانکردنی زیاتر لە ٦٠٠ گوند و شارۆچکە، کوشتنی دەیان هەزار کەس، دەربەدەری زیاتر لە نیوەی دانیشتووانی...

ئێمە قەناعەتمان بەم شتە هەیە: ئەگەر بەرخۆدان و ئەم گەلە نەبوایە، کۆمەڵکوژییەکی جەماوەری لە غەززە و ڕەنگە لە کەناری ڕۆژئاواش رووی دەدا. گەلەکەمان لە غەززە مافی خۆیەتی ئەمڕۆ دەنگی بەرز بکاتەوە، بۆ هەموومان و بۆ جیهان. چونکە ئەمە ئۆپڕاسیۆنی برسیکردنە. ئەمە برسێتی نییە؛ ئەمەش برسێتییەکی بە ئەنقەستە. داگیرکەر منداڵ دەکوژێت و ئافرەتەکان دەکاتە ئامانج و هەموو شتێک لەناو دەبات، هەموو ئەمانەش بۆ یەک ئامانج، ئەویش ئەوەیە بەرخۆدان تەسلیم بکات.

بەڵام بەرخۆدان خۆی ناشارێتەوە، شەڕ دەکات، لێدەدات، هەموو هەوڵێک دەدات بۆ پاراستنی گەلەکەی."(İLKHA)