ئێوارەی ئەمڕۆ شاندەکانی رووسیا و ئۆکرانیا لە ئیستانبوول دەست بە دانوستانەکان دەکەن و کۆبوونەوەکەش بە سەرۆکایەتی هاکان فیدان وەزیری دەرەوەی تورکیا بەڕێوەدەچێت.

خولی سێیەمی دانوستانەکانی شاندەکانی رووسیا و ئۆکرانیا لە ٢٣ی تەمموز لە کۆشکی چەراغان لە ئیستانبوول دەست پێدەکات.

لە کۆبوونەوەکەدا کە هاکان فیدان وەزیری دەرەوەی تورکیا سەرپەرشتی دەکات و بڕیارە ئیبراهیم کاڵن سەرۆکی دەزگای هەواڵگری تورکیا (میت) و جەنەراڵ مەتین گوراک سەرۆکی ئەرکانی گشتیی تورکیا بەشداری بکەن.

شاندێکی ئۆکرانیا بۆ بەشداریکردن لەو دانوستانانەی کە بڕیارە ئێوارەی ئەمڕۆ لە ئیستانبوول بەڕێوەبچێت، گەیشتە تورکیا.

تەوەری سەرەکیی دانوستانەکانی رووسیا و ئۆکرانیا کە بڕیارە لە ئیستانبوول بەڕێوە بچێت، ڕەشنووسی یاداشت و ئاڵوگۆڕی بیروڕا دەبێت.

دوابەدوای دوو خولی دانوستان لە ئەستەنبوڵ لە ١٦ی ئایار و ٢ی حوزەیران، رووسیا و ئۆکرانیا ڕێککەوتن لەسەر ئاڵوگۆڕی زیندانییەکان بەپێی فۆرمولەی "هەزار بۆ هەزار" و گەڕانەوەی دەستگیرکراوانی نەخۆشی سەخت و گەنج (کەمتر لە ٢٥ ساڵ) بە فۆرماتێکی "هەموو بۆ هەمووان" – لانیکەم هەزار کەس لە هەر لایەکەوە.(İLKHA)