Yekîtîya Alim û Medreseyan (ÎTTÎHADUL ULEMA) her sal civînek bi navê hevdîtina aliman li dar dixe, wê vê hefteyê hevdîtina 10emîn bi navê “Hewlên Îdeolojîk A Li Ser Bingeha Nasnameya Me Ya Îslamî” wê di 11-12 Cotmehê de li Dîyarbekirê li dar bixe.

Şîara hevdîtina aliman a vê salê ku her sal ji teref ÎTTÎHADUL ULEMAyê ve tê tertîpkirin wek Hewlên Îdeolojîk A Li Ser Bingeha Nasnameya Me Ya Îslamî” hat diyarkirin. Wê hevdîtina aliman a 10emîn ku ji erdnigarîyên cuda yên cîhanê alim, akademîsyen û şexsîyetên muhîm beşdarî bibin di 11-12ê Cotmehê de li Eywana Konferansa Selaheddîn Eyyûbîya Dîyarbekirê were tertîpkirin.

Berîya civînê ji teref ÎTTÎHADUL ULEMAyê ve daxuyanîya çapemenîyê hat dayîn. Û di daxuyanîyê de derheqê bernameyê de agahî hat dayîn.

Mele Beşî Şîmşek alîkarê Serokê Gîştî yê ÎTTÎHADUL ULEMAyê di daxuyanîya çapemenîyê de bal kişand ku ew ê bi şîara “Hewlên Îdeolojîk A Li Ser Bingeha Nasnameya Me Ya Îslamî” werin cem hev û derheqê meseleya sazîya malbatê û Xezzeyê de wezîfe û mesulîyetan biaxivin.

Mele Beşîr Şîmşek

Şîmşek, “Bernameya me civîna Aliman e ku ev sala 10emîn e em li Amedê pêk tînin. Wê bi îzna Xwedê ew ê vêsalê de di 11-12ê Cotmehê de were tertîpkirin. Şîara bernameya me ew ê ‘Hewlên Îdeolojîk A Li Ser Bingeha Nasnameya Me Ya Îslamî’ be. Mêvanên me piranî ew ê alim û akademîsyenên ji çar parçê Kurdistanê bin. ew ê ji Efxenistan, Misir, Somalî, Mexrîb, Morîtanya û Misirê û gelek welatên dinê wê mêvanên me hebin.”

Şîmşek derheqê meseleya Kurdan de jî axivî û got ew ê di bernameyê de li ser van jî gotûbej werin kirin, “Bi Rastî di navenda bernameya me de meseleya Kurd û Kurdistanê heye. Me got em ê qala malbatê bikin, li ser vêya bi taybetî wê derheqê malbata Kurdan de jî em ê biaxivin. Ew ê 12 axavtvanên me hebin û ew ê her axavtvanekî me li ser meseleyekî bisekine, mînak malbat, exlaq, tiryak û maddeyên hişbiran.”

Beşîr Şîmşek derheqê mêvanên ku ew ê beşdarî bibin de jî agahî da û gotina xwe weha dawî kir, “Her mêvanên me ji bo me suprîz û qenc in. Vê salê jî piranîya mêvanên me akademîsyen in, yanê mirovên ku zanîngehê xwendine. Ew ê hem li ser meseleyên fennî hem jî dînî biaxivin. Xeyn ji vêya ew ê sefîrê Efxenistanê yê Tirkîyeyê jî bibe mêvanê me di bernameya me de. Û ew ê temsîlkarekî muhîm ê HAMASê jî bibe mêvanê me.” (ÎLKHA)