Êrîşa balafirên bêpîlot ên Hêzên Piştgiriya Lezgîn li ser navendeke ezberkirina Quranê li wîlayeta Rehed a Bakurê Kordofanê ya Sûdanê, bû sedema nerazîbûneke berfireh.

Li gorî agahiyên artêşa Sûdanê, di êrîşê de zarokek hatiye kuştin û bi dehan kes jî birîndar bûne. Armancgirtina navendeke perwerdehiyê ya sivîlan careke din giraniya şer nîşan da.

Vê êrîşê nîşan da ku çawa pevçûnên li welat, ku ji Nîsana 2023an vir ve berdewam dikin, sivîlan kirine hedefa rasterast.

Bi zêdebûna pevçûnên li herêma Kordofanê di mehên dawî de, bi sed hezaran kes neçar man ku malên xwe terk bikin. Li gorî Rêxistina Navneteweyî ya Koçberiyê, tenê di çend hefteyên dawî de bi deh hezaran kesên din jî ji cih û warên xwe bûne.

Şerê berdewam li Sûdanê rewşa mirovî ya jixwe xirabtir dike. Sîvîlên ku bi birçîbûnê, qeyrana ewlehiyê û hilweşîna binesaziyê re têdikoşin, niha di hawîrdorekê de ku navendên perwerdehiyê jî dibin hedef, ji bo jiyanê şer dikin.

Bangên civaka navneteweyî ji bo parastina sîvîlan nikarin rastiya li ser erdê biguherînin. Êrîşên bi vî rengî, ku zarok tê de canê xwe ji dest didin, ji bo hemî aliyan wekî bîranînek ji bo berpirsiyariya wan a parastina sîvîlan in.

Heta ku li Sûdanê agirbestek mayînde neyê bidestxistin û bingehek ji bo çareseriyek sîyasî neyê danîn, xuya ye ku talûkeya trajediyên bi vî rengî dê berdewam bike. (ÎLKHA)