HAMASê diyar kir ku êrîşa li ser konên sivîlên koçber ên li herêma Mewasiyê sûcê şer ê nû yê rejîma sîyonîst e, agirbestê îxlal dike û got, "Rejîm ji hemû encamên wê berpirsiyar e, û divê garantor tavilê tedbîran bigirin."

Hamasê êrîşa li ser konên ku sivîlên bêwar li herêma Mawasî ya rojavayê Xan Yûnisê îşev lê dimînin wekî "sûcekî şer ê diyarkirî" bi nav kir.

Di daxuyaniyê de wiha hat gotin: "Ev êrîşa hovane ya rejîma sîyonîst bêrêziyeke eşkere ye li hember peymana agirbestê ya hatiye ragihandin û hewldanek e ji bo dûrketina ji pabendbûnên xwe."

HAMASê rejîma sîyonîst ji vê êrîşê û hemî encamên wê yên gengaz mesul dît.

Tevgerê bang li welatên garantor û navbeynkaran kir ku gavên tavilê û bi bandor bavêjin da ku êrîşên rejîmê rawestînin. "Divê destûr neyê dayîn ku Netanyahu yê sûcdar û hikûmeta wî ya tundrew peymanê sabote bikin, û divê êrîş, nemaze li dijî sivîlan û deverên niştecihbûnê, bi tevahî werin rawestandin." (ÎLKHA)