Navenda Agahdariya Berxwedana Filistînê "Mu'ta" ragihand ku di meha Cotmehê de li Şerîaya Rojava û Qudsê 356 çalakiyên berxwedanê hatine lidarxistin. Di operasyonan de heşt siyonîst birîndar bûn, herî zêde çalakî li Cenîn û Tubasê hatine qeydkirin.

Di meha Cotmehê de, li Şerîaya Rojava û Qudsê 356 çalakiyên berxwedanê li dijî îşxalê hatin lidarxistin. Li gorî raporek ku ji hêla Navenda Agahdariya Berxwedana Filistînê "Mu'ta" ve hatiye weşandin, ev çalakî operasyonên çekdarî, hewldanên danîna teqemeniyan û berxwedana bi kevir û kokteylên molotof dihewîne.

Di raporê de hat diyarkirin ku di meha Cotmehê de di encama çalakiyên berxwedanê de heşt siyonîst birîndar bûne. Çalakiyên herî dijwar li bajarên Cenîn û Tubasê çêbûn.

Li gorî daxuyaniyê, di tevahiya mehê de 16 teqemeniyên destçêkirî hatine çandin an jî teqandin; neh ji van li Cenînê û sê li Tubasê bûn. Di çalakiyekê de ku di 18ê Cotmehê de li Tubasê hat lidarxistin, sê leşkerên siyonîst birîndar bûn û wesayîteke leşkerî ya aîdî hêzên îşxalker hat îmhakirin.

Li gorî daneyên navendê, di meha Cotmehê de şeş êrîş û pevçûnên çekdarî çêbûne. Şehîd Mihemed Elî Ştyya her wiha hewl da ku bi wesayîtê êrîşî xaleke kontrolê ya îşxalkeran li ser "Riya 443" bike, li nêzîkî gundê Beyt U'r el-Fuqa, li rojavayê Ramallahê.

Di aliyê populer ê berxwedanê de, 237 çalakiyên berxwedanê bi keviran, 20 xwepêşandan û 5 êrîşên bi molotof an fîşekên hewayî hatine qeydkirin. Her wiha, 13 bûyerên zirara wesayîtên îşxalker û 57 çalakiyên berxwedanê yên li dijî êrîşên koma Cihûyan hatine ragihandin.

Çavdêrên Filistînî diyar kirin ku ev dane nîşan didin ku berxwedana gel li Şerîaya Rojava her ku diçe zêde dibe û tevî tedbîrên "ewlehiyê" yên hatine girtin jî, îşxalker nekariye îradeya Filistîniyan bişkîne. (ÎLKHA)