Hat ragihandin ku hêzên îşxalker ên siyonîst li bajarokê El-Cudeyra yê li bakurê rojavayê Qudsê du zarok şehîd kirin.

Wezareta Tenduristiyê ya Filistînê di daxuyaniyekê de got, "Di encama gulebarana dijwar a ku hêzên îşxalker şeva borî li herêma El-Hara el-Fuqa ya bajarokê El-Cudeyra vekir de, du zarokên bi navê Mihemed Abdullah Taym ê 16 salî û Mihemed Reşad Fadl Qasim ê 16 salî şehîd bûn."

Rêveberiya Giştî ya Karûbarên Sivîl destnîşan kir ku hêzên îşxalker cenazeyan desteser kirine û nehiştine ku ekîbên tenduristî bigihîjin cihê bûyerê.

Di daxuyaniyek kurt a artêşa îşxalker de, hat îddîakirin ku du xortan kokteylên Molotov avêtine ser rêya ku ji hêla niştecihên siyonîst ên li bajarokê ve tê bikar anîn û leşkeran rasterast gule li wan reşandine.

Parêzgariya Qudsê got, "Hêzên îşxalker li herêma El-Hara El-Fuka, nêzîkî dîwarê îlhaqkirin û berfirehkirinê, nêzîkî malên welatiyan, bi guleyên rastîn Mihemed Abdullah Tayem û Mihemed Reşad Fadl Qasim hedef girtin."

Tê ragihandin ku artêşa îşxalker û niştecihên siyonîst ji destpêka şerê qirkirinê li Xezzeyê ve êrîşên xwe yên li ser Şerîaya Rojava zêde kirine û li gorî çavkaniyên Filistînî, ev yek bûye sedema mirina 1062 sivîlan, birîndarbûna nêzîkî 10 hezar kesan û êsîrgitrina zêdetirî 20 hezar Filistîniyan, ku 1600 ji wan zarok in. (ÎLKHA)