ڤۆلۆدیمیر زێلێنسکی، سەرۆکی ئۆکرانیا ڕایگەیاند، بەهۆی بۆردومانی فڕۆکەی بێ فڕۆکەوانی ڕووسیا بۆسەر ناوچە جیاجیاکانی ئۆکرانیا، ٥ کەس گیانیان لەدەستداوە و ژمارەیەکی زۆریش بریندار بوون.

ڤۆلۆدیمیر زێلێنسکی، سەرۆکی ئۆکرانیا لە هەژماری تایبەتی خۆی لە سۆشیال میدیا ڕایگەیاند، ڕووسیا هێرشی بە فڕۆکەی بێفڕۆکەوان بۆ سەر ناوچە جیاجیاکانی ئۆکرانیا ئەنجام داوە.

زێلێنسکی ڕایگەیاندووە کە فڕۆکەیەکی بێفڕۆکەوانی ڕووسی هێرشی کردووەتە سەر مۆڵێکی بازرگانی لە شاری سومی و ئاماژەی بەوەشکردووە، "٢ کەس کوژراون و ١٤ کەسیش برینداربوون".

لە شاری کیێڤ هێرش کرایە سەر باڵەخانەیەکی ٩ نهۆمی، بەهۆیەوە کەسێک گیانی لەدەستدا و ٧ کەسیش بریندار بوون.

زێلێنسکی ڕایگەیاند کە میکۆلایڤیش هێرشی توندی کراوەتە سەر، ئاماژەی بەوەشکردووە، لەوێ ٢ کەس کوژراون و ٧ کەسیش برینداربوون.(İLKHA)