وتەبێژی وەزارەتی دەرەوەی پاکستان ڕایگەیاند، لەگەڵ ئێران و ئەمریکادا لە پەیوەندیدان بۆ کەمکردنەوەی گرژییەکان لە ناوچەکە.

تاهیر ئەندەرەبی وتەبێژی وەزارەتی دەرەوەی پاکستان لە میانەی کۆنفرانسی ڕۆژنامەوانی هەفتانەی خۆی لە ئیسلام ئاباد باس ناکۆکییەکانی نێوان ئەمریکا و ئێران کرد.

ئەندەرەبی ڕایگەیاند کە ئەوان بە قووڵی نیگەرانن لە تێکچوونی دۆخی ئەمنی ناوچەکە و داوای لە هەموو لایەنەکان کرد خۆیان بگرن.

ئەندەرەبی ڕایگەیاند، "پاکستان داوای دەستپێکردنەوەی دانوستان و دیپلۆماسی و وتووێژ بۆ تێپەڕاندنی ناکۆکییەکان دووپاتدەکاتەوە"، ئاماژەی بەوەشکرد، پاکستان لە پەیوەندیدایە لەگەڵ ئێران و ئەمریکا بۆ ڕاگرتنی شەڕ و گەڕانەوەی لایەنەکان بۆ ڕێککەوتن. ئەندەرەبی وتی، "بۆ ئەوەی ئەمە ڕووبدات، پێویستە هەموو لایەنەکان زۆرترین خۆگرتنیان هەبێت".

ئەندەرابی ڕایگەیاند کە پاکستان لە ڕاوێژکاری بەردەوامدایە لەگەڵ سەرکردەکانی ناوچەکە و ئاماژەی بەوەشکرد، "دەمانەوێت لایەنەکان بگەڕێنەوە بۆ پرۆسەی دانوستانی تەکنیکی".

وتەبێژی وەزارەتی دەرەوەی پاکستان جەختی لەوە کردەوە کە وڵاتەکەی نایەوێت شەڕی بەردەوامی ناوچەکە بە هیچ شێوەیەک درێژە بکێشێت و وتی، "نابێت ئەم ململانێیانە لایەنەکانی دیکە بۆ ناو ململانێکان ڕابکێشن".

ئەندەرەبی درێژەی بە لێدوانەکەی دا و ئەو ئیدیعایانەی کە دەزگایەکی میدیایی ئەڵمانی سەبارەت بە ئاسایشی سەروەت و سامانی ستراتیجی پاکستان بە تایبەتی ئاسایشی ئەتۆمیی پاکستانی ڕەتکردەوە و وتی، "میدیای ئەڵمانیا پێویستە پابەندی ئەخلاقی ڕۆژنامەوانی بێت و خۆیان لە بەرهەمهێنانی سیناریۆی بێ بنەما و نابەرپرسیارانە بەدوور بگرن."(İLKHA)