ناوەندی داتا فەلەستینییەکانی "مەعتی" لە ڕاپۆرتێکی نوێدا، ئاماری پێشێلکردنی مافەکانی فەلەستینییەکان لە شاری قودسی داگیرکراو لە ماوەی هەزار ڕۆژی شەڕی کۆمەڵکوژی دژی کەرتی غەززە بڵاو کردەوە.

بەپێی ئەم ڕاپۆرتە، لە سەرەتای شەڕەوە لە ٧ی ئۆکتۆبەری ٢٠٢٣ەوە تا ئێستا، ٧٥ فەلەستینی لە قودسی داگیرکراو شەهید بوون و ٧٢٨ کەسی دیکەش بریندار بوون.

هەروەها لەم ماوەیەدا، هێزەکانی رژێمی سەهیۆنی ٢٥٩٥ فەلەستینییان لە قودس دەستبەسەر کردووە و هێشتا ١٧٥ کەس لە دانیشتووانی قودس لە زیندانەکانی ئەم رژێمەدان.

ڕاپۆرتی "مەعتی" دەریدەخات سوپای رژێمی سەهیۆنی لەم ماوەیەدا ٢٤٠٣ جار هێرشی کردووەتە سەر ناوچە جیاوازەکانی قودس، ١٠٦٦ جار پشکنین و هێرشی کردووەتە سەر ماڵی فەلەستینییەکان و ٤٦٠٤ حاڵەتی کۆتوبەند، خاڵی پشکنین و ڕێگریی سەربازی دژی فەلەستینییەکان تۆمار کراوە.

هەر لەم ماوەیەدا، داگیرکەران ١٤٦ جار هەنگاویان بۆ داخستنی ناوچە جیاوازەکانی قودس ناوە، ٤٣٦ ماڵی فەلەستینییان وێران کردووە و ٧٢٢ حاڵەت لە ماڵ و سامانی فەلەستینییەکانیان لەناوبردووە. هەروەها ١٠٧ چالاکیی شارۆچکەسازی لەم شارەدا تۆمار کراوە.

لە بەشێکی دیکەی ڕاپۆرتەکەدا هاتووە کە شارۆچکەنشینە سەهیۆنییەکان ٤١٤ حاڵەتی دەستدرێژییان دژی فەلەستینییەکان لە قودس ئەنجام داوە و سەربازانی رژێمی سەهیۆنیش ٦٤ جار هێرشیان کردووەتە سەر دانیشتووانی قودس.

هێزە داگیرکەرەکان هەروەها ١٤٣ حاڵەت لە ماڵ و سامانی فەلەستینییەکانیان دەستبەسەردا گرتووە و ٩٥٠ حاڵەتی تەقەکردنیان لە قودس تۆمار کردووە.

بەپێی ئەم ئامارە، رژێمی سەهیۆنی ٢٤٨ فەلەستینی لە قودس دوورخستووەتەوە، ٩١٣ جار دەستدرێژیی کردووەتە سەر شوێنە پیرۆزەکان، ٢٧ جار ڕۆژنامەنووسان و ٩ جار تیمە پزیشکییەکانی کردووەتە ئامانج.

ئەم ڕاپۆرتە هەروەها باسی لە ٤٨ حاڵەتی پەکخستنی پرۆسەی پەروەردە لە قودس، سەرکوتکردنی ٨٢ خۆپیشاندان دژی تاوانەکانی رژێمی سەهیۆنی و دەستبەسەرداگرتنی ١١ ماڵی فەلەستینی لەلایەن سوپای داگیرکەرەوە کردووە.

بەپێی ڕاپۆرتی مەعتی، ئەم هەنگاوانە بوونەتە هۆی ئاوارەبوونی ١٣٥ کەس لە دانیشتووانی قودس و دەریدەخات هاوکات لەگەڵ بەردەوامیی شەڕی کۆمەڵکوژی دژی غەززە، شاری قودسی داگیرکراویش گەواهی توندبوونەوەی سیاسەتەکانی سەرکوتکردن، دەستبەسەرکردن، وێرانکردن، شارۆچکەسازی و دەستدرێژی بۆ سەر پیرۆزییەکان بووە.(İLKHA)