13 oC 
Güneşli
گرووپەکانی بەرخۆدانی فەلەستین بە دەرکردنی بەیاننامەیەک بە بۆنەی تێپەڕینی ١٠٠٠ ڕۆژ بەسەر شەڕی کۆمەڵکوژیی رژێمی سەهیۆنی دژی کەرتی غەززە، ڕایانگەیاند ئەم تاوانە بە پاڵپشتیی ڕاستەوخۆی حکوومەتی ئەمریکا و لۆبییە ڕۆژئاواییەکان ئەنجام دراوە.
گرووپەکانی بەرخۆدانی فەلەستین بەیاننامەیەک بە بۆنەی تێپەڕینی ١٠٠٠ ڕۆژ بەسەر شەڕی کۆمەڵکوژیی رژێمی سەهیۆنی دژی کەرتی غەززە بڵاو کردەوە.
لەو بەیاننامەیەدا هاتووە جیهان لەم ماوەیەدا شایەتی کۆمەڵکوژییەکی بەرنامەبۆداڕێژراو بووە بە هەموو شێوەکانییەوە؛ بەڵام سەرەڕای قەبارەی وێرانکارییەکان، پەرەسەندنی کارەساتی مرۆیی و توندیی تاوانەکان، رژێمی سەهیۆنی لە هێنانەدیی ئامانجە ڕاگەیەندراوەکانی خۆیدا، بەتایبەتی ئاوارەکردن و ڕیشەکێشکردنی نەتەوەی فەلەستین، شکستی هێناوە.
گرووپەکانی بەرخۆدان جەختیان کردەوە لە ماوەی هەزار ڕۆژ شەڕ و ڕووبەڕووبوونەوەدا، نەتەوەی فەلەستین سەرەڕای بێبەرگریبوون لە بەرامبەر ئامێری شەڕی سەهیۆنی - ئەمریکی و ڕۆژئاواییدا، شکستی نەهێنا و ئەو ڕۆحی بەرخۆدانەی کە لە غەززە و تۆفانەکەیەوە بڵێسەی سەند، ئیتر کوژانەوەی نییە.
ئەم گرووپانە ئۆپەراسیۆنی تۆفانی ئەقسایان بە قۆناغێکی گرنگ لە ڕێڕەوی جیهاد و بەرخۆدانی نەتەوەی فەلەستین لە کاتی داگیرکردنی خاکی فەلەستین لە ساڵی ١٩٤٨ زانی و جەختیان کردەوە ئەم ئۆپەراسیۆنە وەڵامێکی سروشتی بۆ تاوانە بەردەوامەکانی رژێمی سەهیۆنی لە غەززە، کەناری ڕۆژئاوا و قودس و هەروەها گەمارۆدان، نیشتەجێکردن و جوولەکەسازی بووە.
لە درێژەی بەیاننامەکەدا هاتووە ئەوانەی هەوڵ دەدەن تۆفانی ئەقسا وەک سەرەتای ململانێ یان هۆکاری ئازاری نەتەوەی فەلەستین بناسێنن، دەبێت بزانن تاوانەکانی رژێمی سەهیۆنی لە کاتی داگیرکردنی فەلەستینەوە تاکوو ئێستا هەرگیز نەوەستاوە و بەرخۆدان هەمیشە لە هەموو گۆڕەپانەکانی جیهاد، خەبات و خۆڕاگریدا بەردەوام بووە.
گرووپەکانی بەرخۆدانی فەلەستین جەختیان لەسەر مافی نەتەوەی فەلەستین بۆ بەرخۆدان بە هەموو شێوەکانییەوە کردەوە و داوای چڕکردنەوەی بەرخۆدانیان لە کەناری ڕۆژئاوا، قودس و خاکە داگیرکراوەکانی ١٩٤٨ بۆ ڕووبەڕووبوونەوەی پیلانەکانی لکاندن، نیشتەجێکردن، جوولەکەسازی و هەوڵەکانی رژێمی سەهیۆنی بۆ یەکلاییکردنەوەی ململانێکان کرد.
ئەم گرووپانە هەر جۆرە سەرپەرشتییەکی دەرەکییان بەسەر نەتەوەی فەلەستیندا ڕەت کردەوە و جەختیان کردەوە بەڕێوەبردنی کەرتی غەززە پرسێکی ناوخۆییە. ئەوان هەروەها لە لێژنەی کارگێڕیی ناسراو بە "لێژنەی تەکنۆکراتەکان" داوایان کرد هەرچی زووە بچێتە ناو کەرتی غەززەوە و بەرپرسیارێتییەکانی خۆی دەست پێ بکات.
لەو بەیاننامەیەدا جەخت لەسەر پێویستیی دەستپێکردنی گفتوگۆی نەتەوەیی گشتگیر بۆ دروستکردنی بەشداریی سیاسیی ڕاستەقینە، داڕشتنی ستراتیژیی نەتەوەیی یەکگرتوو، تاوتوێکردنی پرسە گەورە نەتەوەییەکان، ڕێکخستنی ماڵی فەلەستینی و ئاوەدانکردنەوەی دامەزراوە نەتەوەییەکان، لەوانە ڕێکخراوی ڕزگاریخوازی فەلەستین، بە جۆرێک کە لەخۆگری هەموو نەتەوەی فەلەستین بێت، کراوەتەوە.
لە کۆتاییدا گرووپەکانی بەرخۆدان داوای هەڵوێستێکی کاریگەر و فشار دروستکەر لە لایەن جیهانی عەرەبی و ئیسلامییەوە بۆ چەسپاندنی تەواو و گشتگیری ڕاگرتنی شەڕ، بەکارهێنانی هەموو ئامرازەکانی فشاری عەرەبی و ئیسلامی، کاراکردنی ڕۆڵی نەتەوەکان و ئازادیخوازانی جیهان و ڕووبەڕووبوونەوەی هەموو شێوەکانی ئاساییکردنەوەی پەیوەندییەکان لەگەڵ رژێمی سەهیۆنیدا کرد.(İLKHA)
ئاگاداری: مافی له به رگرتنه وه ی بابه ته كانی ئیلكھه، پارێزراون ھه واڵی نوسراو، وێنه، ڤیدیۆ، به ھه مو جۆرێكیان، بۆ به ده ست ھێنان پێویسته نوسراو له نێوانمان ھه بێت یان به ڕه زامه ندی ئێمه بێت، پێچه وانه كه ی به ر پرسیاره تی یاسای تیایه
داگیرکەرانی سەهیۆنی لە کەناری ڕۆژئاوا درێژەیان بە سیاسەتی ڕووخاندن دا. لە بەیت لەحم خانوویەکی دوو نهۆمییان ڕووخاند و ئیدیعایان کرد کە بەبێ مۆڵەت دروستکراوە و ٣ خانووی کشتوکاڵییان لە نابلوس و سەلفیت کردە ئامانج. ئەو ناوچەیە لە کاتی ڕووخاندنەکاندا گەمارۆ درا و بەشێک لە فەلەستینیەکان دەستبەسەر کران.
بزووتنەوەی خۆڕاگری ئیسلامیی حەماس بە دەرکردنی بەیاننامەیەک، لێدوانە باسکراوەکانی لایەن دامەزراوەی ناسراو بە "ئەنجوومەنی ئاشتی لە کەرتی غەززە" و هەروەها هەڵوێستی حکومەتی ئەمریکا سەبارەت بە داهاتووی ئاژانسی فریاگوزاری و کاردۆزینەوە بۆ ئاوارە فەلەستینییەکان "ئۆنروا" بە توندی سەرکۆنە کرد.
غەززە، لە سەردەمی ئەو گەمارۆ و پەلامارەدا کە هەزار ڕۆژ تێپەڕیوە، تەنیا هەرێمێکی کۆمەڵکوژی و جینۆساید نییە، بەڵکو گەڕاوەتەوە بۆ جوگرافیایەکی کارەسات کە سیستەمی تەندروستی ڕووخاوە، ژێرخانی وێران بووە، برسێتی تەشەنەی کردووە و دیمۆگرافیاکەی گۆڕاوە. بێکاریگەری سیستەمی نێودەوڵەتیش قەیرانەکەی قووڵتر کردووەتەوە.
