وتەبێژی کەتیبەکانی قەسامی حەماس ڕایگەیاند کە ئەم بزووتنەوەیە بەپێی ڕێککەوتنی ئاگربەست، هەموو پابەندبوونەکانی خۆی لە بەرامبەر دۆسیەی دیلەکان و تەرمەکان بە شەفافیەتی تەواو جێبەجێ کردووە و سەرەڕای کۆسپ و تاوانەکانی رژێمی سەهیۆنی، هەموو بابەتەکانی لە خێراترین کاتدا ڕادەست کردووە.

ئەوو عوبەیدە، وتەبێژی سەربازیی کەتیبەکانی قەسام، باڵی سەربازیی بزووتنەوەی خۆڕاگری ئیسلامیی فەلەستین (حەماس) شەوی دووشەممە لە ڕاگەیەندراوێکی نووسراودا جەختی لەسەر جیددییەتی بەرخۆدان کردەوە بۆ داخستنی تەواوی دۆسیەی دیلەکان لە پێناو بەرژەوەندییەکانی گەلی فەلەستین و وتی، "ئێمە لە بارودۆخێکی ئاڵۆز و نزیک لە مەحاڵدا، کاری گەڕان و ڕادەستکردنی تەرمی دیلەکانمان بە ئاگاداریی نێوەندگیرەکان گەیاندە ئەنجام. ئێستا داوا لە نێوەندگیرەکان دەکەین بەرپرسیارێتیی خۆیان جێبەجێ بکەن و داگیرکەران پابەند بکەن بە جێبەجێکردنی تەواوی ڕێککەوتنەکان."

ناوبراو سەبارەت بە تەرمی ڕان گۆیلی، سەربازی داگیرکەر، ڕوونی کردەوە، "ئێمە هەموو وردەکاری و زانیارییە پەیوەندیدارەکان بە شوێنی بوونی تەرمی ئەم دیلەمان خستووەتە بەردەستی نێوەندگیرەکان. بەڵگەی ڕاستگۆیی ئێمەش ئەوەیە کە سوپای دوژمن ئێستا بەپێی زانیارییە پێشکەشکراوەکان لەلایەن قەسامەوە، خەریکی گەڕانن لە یەکێک لە شوێنە دیاریکراوەکان."

وتەبێژی قەسام لە درێژەدا بە توندی ڕەخنەی لە هەنگاوەکانی توخمە بەکرێگیراو و دزەکردووەکان گرت کە بە "موستەعریبین" ناسراون و وتی، "هەنگاوە نزمەکانی ئەم کەسانە دژی ڕۆڵەکانی گەل و جەنگاوەرە بەشەرەفەکان، نیشاندەری هاوتەریبیی تەواوی ئەوانە لەگەڵ بەرنامەی کاری داگیرکەران. ئەم کەسانە تەنیا لەو ناوچانەی لەژێر کۆنترۆڵی سوپای سەهیۆنیدان و لە پەنای تانکەکانی ئەواندا بوێریی خۆدەرخستنیان هەیە."

ئەبو عوبەیدە بە وەسفکردنی ئەم بەکرێگیراوانە وەک "نەوەکانی ئەبووڕیغال" (کەسایەتییەکی کۆن و هێمای خیانەت و بەکرێگیراوییە لای عەرەبەکان)، جەختی کردەوە، "خیانەت و زۆرداری دژی مەدەنییەکان و پاڵەوانانێک کە بەدەست برسێتی و گەمارۆوە دەناڵێنن، نیشانەی ئازایەتی نییە، بەڵکوو هەوڵێکی بێهیوایانەیە بۆ سەلماندنی خود. چارەنووسی حەتمیی ئەم سەگە شوێنپێهەڵگرانە و ئامرازەکانی دەستی دوژمن، مەرگ و لەناوچوونە؛ دوژمن هەرگیز ناتوانێت لە بەرامبەر دادپەروەریی گەل بیانپارێزێت و خاکی پاکی فەلەستین تەنانەت تەرمە بۆگەنبووەکانیشیان لەخۆ ناگرێت."

ناوبراو لە کۆتاییدا بە سڵاوکردن لە جەنگاوەرانی بەرخۆدانی گەمارۆدراو لە رەفەح ئاماژەی بەوە کرد، "پاڵەوانانی ئێمە کە زەلیلییان قبووڵ نەکرد و شەهیدبوونیان بەسەر خۆبەدەستەوەداندا هەڵبژارد، داستانێکی نەمریان بۆ نەوەکانی داهاتوو دروست کرد و ناویان لە لاپەڕەکانی سەروەری و شانازیدا هەڵدەکۆڵرێت."(İLKHA)