دوای کۆبوونەوەی سێقۆڵی لە نێوان تورکیا-ئەمریکا-ئۆکراینا و تورکیا-رووسیا-ئۆکراینا روستەم عومەرۆڤ وەزیری بەرگری ئۆراینا راگەیاند، "(لەگەڵ رووسیا) لەبارەی ئاڵوگۆڕی هەزار ئەسیر لە بەرامبەر هەزار ئەسیر رێککەوتین."

کۆبوونەوەی سێقۆڵی تورکیا-ئەمریکا-ئۆکراینا لە ئۆفیسی سەرۆکایەتی کۆماری تورکیا لە دۆلماباغچە بەڕێوەچوو.

شاندەکانی تورکیا، ئەمریکا و ئۆکراینا بە سەرۆکایەتی هاکان فیدان وەزیری دەرەوەی تورکیا کۆبوونەوە. کۆبوونەوەکە نزیکەی کاتژمێرێک بەردەوام بوو و لە کاتی کۆبوونەوەکە ئیبراهیم کالن سەرۆکی دەزگای هەواڵگری تورکیا (میت) ئامادە بوو.

هەروەها مارکۆ روبیۆ وەزیری دەرەوەی ئەمریکا، تۆم باراک باڵیۆزی ئەمریکا لە ئەنقەرە و کیت کێلۆگ نوێنەری تایبەتی دۆنالد ترامپ بۆ ئۆکراینا لە شاندی ئەمریکا ئامادەبوون.

لە شاندی ئۆکراینا ئەندری یەرماک سەرۆکی ئۆفیسی سەرۆکایەتی ئۆکراینا، ئەندری سیبیها وەزیری دەرەوەی ئۆکراینا و روستەم عومەرۆڤ وەزیری بەرگری ئۆکراینا ئامادە بوون.

دوای کۆبوونەوەکە عومەرۆڤ وەزیری بەرگری ئۆکراینا راگەیەندراوێکی بڵاو کردەوە و وتی، "(لەگەڵ رووسیا) لەبارەی ئاڵوگۆڕی هەزار ئەسیر لە بەرامبەر هەزار ئەسیر رێککەوتین."

دوای ٢٤ی شوباتی ٢٠٢٢ کە شەڕی رووسیا-ئۆکراینا دەستی پێکرد رووسیا بەشێکی گەورەی ناوچەکانی دۆنێتسک، لوهانسک، خەرسۆن و زاپۆریژیای ئیلحاق کردووە.

هەروەها رووسیا پێشتر لە ساڵی ٢٠١٤ نیمچەدوورگەی کریمیای ئیلحاق کردبوو کە نزیکەی یەک لە پێنجی خاکەکانی ئۆکراینای پێکدەهێنا.(İLKHA)