سەرۆکایەتی کاروباری مرۆیی و یاسایی هودا پار لە ساڵوەگەڕی کۆمەڵکوژی گەلیێ زیلان ڕایگەیاند، "بەناوی دادپەروەری و ڕاستی و ئاشتی کۆمەڵایەتی داوا لە دەسەڵاتدارانی دەوڵەت دەکەین ڕووبەڕووی ئەم بەرپرسیارێتییە مێژووییە ببنەوە."

سەرۆکایەتی کاروباری مرۆیی و یاسایی هودا پار لە بەیاننامەیەکی نووسراودا سەبارەت بە ساڵیادی کۆمەڵکوژیی گەلیێ زیلان کە لە ساڵی ١٩٣٠ لە دۆڵی زیلان رووی دا و هەزاران کەس گیانیان لەدەستدا بڵاو کردەوە و داوای ڕووبەڕووبوونەوەی ڕووداوە دڵتەزێنەکانی ڕابردوو بە تایبەتی کۆمەڵکوژی زیلان و داوای لێبوردن لە قوربانییەکان کرد.

"گیان لەدەستدانی قورس ڕوویداوە، بەبێ جیاوازی لەنێوان ژن و منداڵ و بەساڵاچووان"

هودا پار لە بەیاننامەکەدا ئاماژەی بەوە کرد کە لە کۆمەڵکوژی گەلیێ زیلان لە شارۆچکەی ئەرجیشی پارێزگای وان لە ١٣ی تەمووزی ١٩٣٠ هەزاران کوردی مەدەنی گیانیان لەدەستداوە و دواتر هاتووە، "ئۆپەراسیۆنە سەربازییەکە کە لەلایەن فەیلەقی ٩ بە فەرماندەیی فەریق ساڵح ئۆمورتاک بەڕێوەچوو، بەپێی بڕیاری ژمارە ٨٦٩٢ کە لەلایەن ئەنجومەنی وەزیرانی ئەو سەردەمەوە درابوو ئەنجام درا؛ ژمارەیەکی زۆر لە گوندەکان وێران بوون، دەست بەسەر موڵک و ماڵی خەڵکدا گیرا و قوربانییەکی زۆریش روویدا، بەبێ ئەوەی ڕەچاوی ژنان و منداڵان و بەساڵاچووان بکرێت."

لە بەیاننامەکەدا ئاماژە بەوە کرا کە لە میدیاکانی ئەو کات بینرا کە رووداوەکە چەندە قورس بووە و دواتر هاتووە، "دەستەواژەی 'دۆڵی زیلان تا لێوار پڕ بووە لە لاشەی مرۆڤ'، کە لە ژمارەی ١٦ی تەمموزی ١٩٣٠ی ڕۆژنامەی جمهوریەتدا بەکارهاتووە، لە نیشاندانی قەبارەی ئەم رووداوە دڵتەزێنەدا کە جێپەنجەیەکی قووڵی لەسەر یادەوەرییەکانی خەڵک بەجێهێشتووە، جێگەی سەرنجە."

هودا پار جەختی لەوە کرد کە ناتوانرێت رووداوەکە تەنها وەک ئۆپڕاسیۆنێکی سەربازی هەڵبسەنگێرێت و دواتر هاتووە، "ئەم رووداوانە لە یادەوەریی بەکۆمەڵدا وەک یەکێک لە نموونە ئازاربەخشەکانی ئەو پێشێلکارییە توندانەی مافی مرۆڤ ماونەتەوە کە بەهۆی سیاسەتەکانی ئینکاری، ئاسمیلەکردن و ئاسایشی نائاسایی کە لە ساڵانی سەرەتای کۆماردا جێبەجێکراون. سەرەڕای تێپەڕبوونی ٩٦ ساڵ، بەڵام چاوەڕوانییەکان بۆ ئاشکراکردنی تەواوی ڕاستییەکان سەبارەت بەم رووداوانە جێبەجێ نەکراون. نەکردنەوەی ئەرشیفی فەرمی بە تەواوی بەڕووی توێژەراندا، نەبوونی هەنگاوی هەمەلایەنە بۆ چارەسەرکردنی ناڕەزایەتییەکان و بێتوانایی لە ڕووبەڕووبوونەوەی رووداوە مێژووییەکان، گەڕان بەدوای دادپەروەریدا بە زیندووی دەهێڵێتەوە."

لە بەیاننامەکەدا ئاماژە بەوە کراوە کە ڕووبەڕووبوونەوەی رووداوە ئازاربەخشەکانی ڕابردوو پێویستە بۆ بەهێزکردنی ئاشتی کۆمەڵایەتی و بنیاتنانی داهاتوویەکی هاوبەشی ئەمن و دواتر هاتووە، "بەم بۆنەیەوە بە ڕەحمەوە یادی هەموو ئەو قوربانییە بێتاوانانە دەکەینەوە کە لە زیلان گیانیان لەدەستدا؛ و بەناوی دادپەروەری و ڕاستی و ئاشتی کۆمەڵایەتیەوە بانگەوازی دەسەڵاتدارانی دەوڵەت دەکەین ڕووبەڕووی ئەم بەرپرسیارێتییە مێژووییە ببنەوە."(İLKHA)