Parlamenterê Mersînê yê HUDA PARê Faruk Dînç projeya sîstema rêya hesinî ya ku demek dirêj e li bendê ye ji bo Dîyarbekirê anî Meclîsê.

Parlamenterê Mersînê yê HUDA PARê Faruk Dînç pirsek ji Serokê Meclisê re şand û ji Wezîrê Hawirdor, Bajarvanî û Guherîna Avhewayê Murat Kurum bersiv xwest.

Dînç tekez kir ku pirsgirêka trafîkê li Dîyarbekirê pir girîng e, lê sîstema rêhesinê hêna jî nehatiye çêkirin.

"Cihbicîhkirina vê projeyê yek ji pêşîniyên sereke yên welatiyên me ye"

Dînç bal kişand ser daxuyaniyên Şaredarê Bajarê Mezin ê Dîyarbekirê di civîna Lijneya Koordînasyona Parêzgehê de û daxuyaniyên wî yên ku digotin proje di Bernameya Veberhênanê ya Serokomariyê de heta sala 2028an cih digire û danûstandinên fînansekirinê bi Ajansa Geşepêdanê ya Fransî (AFD) re berdewam dikin, bi bîr xist.

Dînç diyar kir ku projeya pergala rêhesinê demek dirêj e di rojeva bajêr de ye û got, "Cihbicîhkirina vê projeyê, ku ji bo çareserkirina pirsgirêka trafîkê li Dîyarbekirê pir girîng e, yek ji daxwazên pêşîn ên welatiyên me û raya giştî ye."

Parlamenterê HUDA PARê Dînç ji Wezîr Kurum ev pirs pirsî:

1. Şaredariya Bajarê Mezin a Dîyarbekirê derbarê projeya sîstema rêhesinê ya ku dê li Dîyarbekirê were çêkirin de çi plansazî û xebat dimeşîne?

2. Hewldanên derbarê fînansekirina projeyê de di çi merhaleyê de ne?

3. Pêvajoya avakirina projeyê kengî dest pê dike? Kengî tê plankirin ku were temamkirin?

4. Gelo di navbera Şaredariya Bajarê Mezin a Dîyarbekirê û hikûmeta navendî de di derbarê projeya sîstema rêhesinê de hevkariyek heye?

5. Di pêkanîna projeyê de pirsgirêk û zehmetî çi ne? Sedema van pirsgirêk û zehmetiyan çi ye? (ÎLKHA)