Li Êlihê li erdên çandiniyê yên hişk, çinîna genim û ceh dest pê kiriye. Lêbelê, ji ber ku di dema çandiniyê de li herêmê baran kêm bûye, berhem pir kêm bûye.

Serokê Şaxa Êlihê ya Odeya Endezyarên Çandiniyê Ebubekir Dogan ji ÎLKHAyê re got ku windabûna navînî ya berhemê ji sedî 30 bû, û li hinek herêman gihîşt ji sedî 60-70.

Dogan got ku ji ber ku di dema çandiniyê de baran kêm barî, kêmbûnek cîddî di berhemê de çêbûye û vê yekê tesîreke xerab a aborî li ser cotkaran kiriye.

Dogan tekez kir ku buhayê kirîna genim ê ku ji hêla Wezareta Çandiniyê ve hatî ragihandin ji bo berhemên ku ji ber ziwabûnê kalîteya wan xirab bûye têrê nake, û diyar kir ku piştgiriya lezgîn hewce ye.

Ebûbekîr Dogan

"Ziyaneke mezin di hilberînê de heye"

Dogan got, "Me li herêmê hem genim û hem jî ceh ji bo erdên çandiniyê yên hişk dest bi çinînê kiriye. Niha çinîna ceh didome. Ji ber germbûna gerdûnî û barana kêm di dema çandiniyê de windahiyek mezin di berhemê de heye. Navînî windahiyek berhemê ji sedî 30 heye, lê li hinek deveran dikare bigihîje ji sedî 60-70. Ev ê tesîreke xerab a cîddî li ser cotkarên me bike."

"Fiyet têrê nake"

Dogan diyar kir ku fîyeta 13,500 TL ku ji hêla Wezareta Çandinî û Daristanan ve ji bo genim hatiye ragihandin têrê nake û got, "Wezareta Çandiniyê derbarê genim de fîyetek da. 13,500 TL. Bê guman, ev asta jorîn e. Ev fîyetek e ku ji bo hilberên pola yekem tê dayîn. Ev fîyeyek têrker nîne. Ji ber ku gelek hilberên me ji ber ziwabûnê nayên kirîn. Kalîteyê kêm dibe. Ji bilî berhemê, di kalîteyê de jî windahiyek mezin heye."

“Cotkar di rewşeke pir xirab de ne”

Dogan, ku daxuyaniya xwe bi banga piştgiriyê ji bo cotkaran didomand, got, "Cotkarên me gelek zehmetiyan dikişînin. Em ji rayedaran piştgiriyê ji bo cotkarên xwe dixwazin. Berhem û kalîteya kêm dê ji bo cotkarên me bibe sedema êşên giran."

Hamdullah Yargin

Daxwaza piştgiriyê ji cotkaran

Hamdullah Yarginê cotkarê gundê Mozgelana Êlihê diyar kir ku wî îsal li ser 450 donim erdê genim û ceh çandiye, lê hema bêje ti berhem negirtiye.

Yargın bi gotina "Em hem genim û hem jî ceh berhev dikin, me bi tevahî 450 donim erd çandin. Îsal berhem tune. Sedem hişkesaliya hewayê ye. Zivistanê baran nebarî. Me êş kişand. Ger rayedar alîkariya me bikin dê baş be." (ÎLKHA)