Sekreterê Giştî yê Tevgera Hizbullahê Şêx Naîm Qasim di axaftina xwe ya salvegera şehadeta yek ji fermandarên xwe yên payebilind Elî Karakî de ragihand ku ew ê li dijî rejîma sîyonîst micadeleya xwe bidomînin.

Şêx Qasim behsa peymana agirbestê ya bi rejîma siyonîst re kir û diyar kir ku Hizbullah hemû şertên peymanê bicîh aniye û hikûmeta Lubnanê artêşa xwe ber bi herêmên başûr ve şandiye. Lêbelê, wî bal kişand ku rejîma siyonîst di heşt mehên borî de 3800 caran agirbest îxlal kiriye û êrîşên xwe berdewam kiriye.

Qasim got, "Emrîkayî dixwazin berxwedanê bêtesîr bikin heta ku rejîma sîyonîst aram bikin," û diyar kir ku Emrîkayê vê dawiyê peymanek nû pêşkêş kiriye, lê îxlalkirinên berê paşguh kiriye.  

Rêberê Hizbullahê her wiha behsa zextên ku ji teref Emrîka û rejîma sîyonîst ve li ser Îranê têne kirin kir û îddîa kir ku Tehran di şerê 12 rojî yê ku vê dawiyê li ser Îranê hatiye ferzkirin de bi ser ketiye. Qasim destnîşan kir ku rejîma sîyonîst bi hinceta bernameya xwe ya nukleerî êrîşan kiriye, lê Ajansa Navneteweyî ya Enerjiya Atomî piştrast kiriye ku bername aştiyane ye.

"Heta ku berxwedan berdewam bike, rejîma siyonîst wê bi ser nekeve"

Sekreterê Giştî di dawiya axaftina xwe de li ser geşedanên sîyasî yên li Lubnanê jî rawestiya û diyar kir ku hemû beşên civakê yên ku piştgiriyê didin berxwedanê, di nav de Hizbullah û Tevgera Emel jî, di bin tehdîdê de ne û gotina xwe ya "Heta ku berxwedan berdewam bike, rejîma sîyonîst wê bi ser nekeve " dubare kir. (ÎLKHA)