Ji ber bombebarana firokeyên şer ên rejîma sîyonîst li xwaringehek û bazarek li navçeya El-Rîmal a rojavayê bajarê Xezzeyê, herî kêm 32 Filistînî şehîd bûn û gelek kes jî birîndar bûn.

Hat ragihandin ku hêza hewayî ya sîyonîst bi du mûşekan di heman demê de xaçerêyek ku xwaringehek û bazarek lê bûn hedef girt.

Êrîşê wêraniyeke berfireh çêkir û herêm di nav gola xwîn û perçeyên laş de hişt, ku ji hêla çavkaniyan ve wekî "karesatek" hate binavkirin.

Medyaya herêmî ragihand ku di êrîşa hewayî ya balafirên şer ên siyonîst de ku li ser xwaringeh û bazarek giştî li bajarê Xezzeyê hedef girt, 32 sivîl, di nav wan de rojnamevan Yahya Subaih jî hebû, şehîd bûn û gelekên din jî birîndar bûn.

Her çiqas rewşa xeternak a li dora herêma hedefgirtî û topbarana berdewam zehmetiyên mezin çêdikir jî, tîmên ambûlans û parastina sivîl hewlên mezin dan da ku cenazeyan derxînin û birîndaran veguhezînin.

Ofîsa Medyayê ya Hikûmetê ragihand ku dagirkeriya siyonîst di 24 demjimêran de çar komkujî pêk anîne. Komkujî agirê rasterast ê topxaneyê li du dibistanên ku zêdetirî 10,000 kesên bêwar lê diman, xwaringehek qerebalix û bazarek giştî hedef girtin, û bûn sedema mirina gelek sivîlan .

Di daxuyaniyê de hat gotin ku ev sûc beşek ji polîtîkayeke sîstematîk a hedefgirtina mirovên bêguneh in.

Di 18ê Adara 2025an de, rejîma îşxalker bi şikandina agirbestê û dorpêçkirina Xezzeyê tundtir kir, êrîşên xwe ji nû ve dest pê kir.

Rejîma îşxalker bi piştgiriya Emrîka û Ewropayê ji 7ê Cotmeha 2023an vir ve li Xezzeyê qirkirinê pêk tîne û di encamê de zêdetirî 170 hezar Filistînî, ku piraniya wan zarok û jin in, şehîd û birîndar bûne. Her wiha, zêdetirî 14,000 kes hîn jî winda ne.

Ji aliyê din ve, medyaya Filistînî ragihand ku hejmara şehîdên di bombebaranên dagirkeriyê yên ku ji îro sibê ve li Xezzeyê hatine kirin de gihîştiye 66 kesan. (ÎLKHA)