Di encama êrîşan siyonîstan a li ser Şerîda Xezzeyê de 3 rojnamevanên Filistînî yên din jî şehîd bûn.

Di daxuyaniya ku ji teref Ofîsa Medyaya Hukûmetê ya li Xezzeyê hat kirin de hate gotin ku di êrîşên dawî yên artêşa îşxalker de sê rojnamevanên din jî şehîd bûne, bi vî awayî hejmara rojnamevanên ku ji 7ê Cotmeha 2023an vir ve hatine şehîdkirin gihîştiye 251an.

Di daxuyaniyê de hat destnîşankirin ku di êrîşên dawî de, Muhammed Kuweyfî ji Ajansa Nûçeyan a Şihabê, Eymen Heniye ku wekî kameraman ji bo Al-Manara Media dixebitî û Îman Zamilyê nûçegihana Tora Nûçeyan a Filistînê, hatine kuştin.

Çavkaniyên sihetê gotin ku rojnamevan Kuweyfî di êrîşekê de li ser konê ku li ser banê mala wî li taxa Nasr a Xezzeyê hatibû danîn, hat kuştin.

Di daxuyaniya xwe de, Ofîsa Medyayê kuştina sîstematîk a rojnamevanan bi tundî şermezar kir û ji Federasyona Navneteweyî ya Rojnamevanan û Rojnamevanên Ereb, û her weha ji hemî rêxistinên rojnamegeriyê xwest ku êrîşên li ser xebatkarên medyayê yên Filistînî şermezar bikin.

Her wiha di daxuyaniyê de îsraîl û rêveberiya Emerîkayê û her wiha welatên wekî Brîtanya, Almanya û Fransa, ji van êrîşan berpirsiyar hatin dîtin. (ÎLKHA)