Hikûmeta Îrlandayê pêşnûmeyek pejirand ku tê de qedexeya hatina berhemên ku ji wargehên sîyonîst ên li Şerîaya Rojava û Qudsa Rojhilat tên îtxalkirin heye, û ev yek Îrlanda dike yekem welatê Ewropayê ku bi fermî vê gavê diavêje.

Hikûmeta Îrlandayê biryareke girîng îmze kir ji bona ku têkiliyên aborî yên bi wargehên sîyonîst ên ku bi îxlalkirina qanûnên navneteweyî hatine avakirin re sînordar bike.

Bi pêşnûmeqanûna ku hatiye qebûlkirin, îtxalkirina kelûpelan ji wargehên li axên Filistînî yên îşxalkirî li Şerîaya Rojava û Qudsa Rojhilat dê were qedexekirin.

Çavkaniyên fermî ragihandin ku bi vê biryarê re, Îrlanda bû yekem welatê Yekîtiya Ewropayê ku li dijî berhemên ji herêmên îşxalkirî tên, cezayên qanûnî ferz kir.

Qanûn wekî helwestek li ser bingeha hiqûqa navneteweyî li dijî polîtîkayên îşxalê hate hesibandin û ji hêla parêzvanên mafên mirovan ve jî hate pêşwazîkirin.

Li Îrlandayê, rêxistinên civaka sîvîl û parlamenteran demek dirêj e ku daxwaza avêtina gavan di vî warî de dikin, û tekez dikin ku berhemên ji wargehên sîyonîst di şert û mercên neexlaqî de têne hilberandin û mafên bingehîn ên gelê Filistînê îxlal dikin.

Qanûna nû dê qedexe bike ku berhemên çandiniyê û kelûpelên din ên bazirganî yên li deverên dagirkirî têne hilberandin bikevin bazara Îrlandayê, û dê cezayên giran ji bo şîrket û îtxalkarên ku li gorî qanûnê tevnagerin werin birîn.

Ev gav ji bo welatên din ên Ewropayê wekî mînakek tê dîtin. Çalakvanên alîgirê Filistînê û rêxistinên mafên mirovan hêvî dikin ku ev gava Îrlandayê li welatên din ên Ewropayê jî belav bibe. (ÎLKHA)