HAMAS diyar kir ku rejîma sîyonîst bêparbûna avê û birçîbûnê li Xezzeyê wekî çekek bikar tîne.

Di daxuyaniyekê ku ji teref HAMASê ve hat belavkirin de, hat diyarkirin ku rejîma sîyonîst bi rêya mekanîzmaya alîkariyê ya ku di bin sîwana Emrîkayê de veguheriye xefika mirinê, sûcên xwe yên li dijî sivîlên bêparastin ên li Xezzeyê didomîne.

Di daxuyaniyê de hat gotin ku hejmara kesên ku ji bo wergirtina alîkariya mirovî çûne navendên qaşo Weqfa Alîkariya Mirovî ya Xezzeyê ku di bin kontrola rejîma Emrîka-sîyonîst de ne û canê xwe ji dest dane roj bi roj zêde dibe.

Hate diyarkirin ku rejîma sîyonîst ku li Xezzeyê sîyaseta birçîbûnê dimeşîne û xwarinê wek çek bikar tîne, ji meha Adarê ve êrîşên xwe yên li ser tesîsên bêxwêkirina ava behrê li Xezzeyê zêde kiriye û " îsraîl birçîbûn û tîbûnê wek çek li dijî bi mîlyonan sîvîlan bikar tîne û ev rewş karesata mirovî ya li Xezzeyê kûrtir dike. Ew ji qirkirina ku berdewam dike re sûcekî nû zêde dike."

Hat bibîrxistin ku şaredariyên li Şerîda Xezzeyê ji ber kêmbûna sotemeniya ku ji bo xebitandina çend bîrên çalak hewce dike û hilweşandina binesaziya avê ya bi zanebûn, ji krîzeke avê ya karesatbar hişyarî dan.

Di daxuyaniyê de hat destnîşankirin ku hedefgirtina bi zanebûn û berdewam a dibistanan, navendên penaberên Filistînî yên koçber, nexweşxane û saziyên tenduristiyê yên li Xezzeyê ji teref rejîma sîyonîst ve sûcek sîstematîk e.

Di daxuyaniyê de êrîşên rejîma sîyonîst ên li ser sîvîlan, bi taybetî yên ku alîkariya mirovî dixwazin, şermezar kirin û daxwaza vegera bo mekanîzmaya Neteweyên Yekbûyî di belavkirina alîkariyên mirovî de hat kirin.

Rejîma sîyonîst ji 27ê Gulanê ve bi aktîvkirina Weqfa Alîkariya Mirovî ya Xezzeyê ku ji teref Emrîkayê ve tê birêvebirin, bi rêya belavkirina alîkariyên qaşo li derveyî kontrola Neteweyên Yekbûyî (NY) û rêxistinên alîkariyê yên navneteweyî, alîkariyên qaşo belav dike.

Lêbelê, ev avahî ji hêla NY ve nayê naskirin û ji hêla komên Filistînî ve tê redkirin.

HAMAS vê pergalê wekî "kemînên mirinê" bi nav dike. (ÎLKHA)