Emrîka ji ber êrîşa leşkerî ya muhtemel a li ser Îranê amadekariyên xwe yên leşkerî li Rojhilata Navîn leztir dike, û çalakiya xwe ya li herêmê bi girîngî zêde dike.

Li gorî raporên di medyaya sîyonîstan de, di navbera Washington û Tel Avîvê de hevrêziyeke xurt di derbarê van sewqiyatan de heye, ku armanca wan xurtkirina sîstemên parastina hewayî li herêmê ye.

Li gorî agahiyên ku ji aliyê qenala nûçeyan ve hatine belavkirin, di nav 24 saetên dawî de herî kêm 10 balafirên veguhêz ên leşkerî yên Amerîkî li baregehên hewayî yên Ovda û Nevatim ên li başûr daketine.

Agahiyên şopandina firînê yên çavkaniya vekirî jî vê çalakiyê piştrast dikin, û hatiye destnîşankirin ku hinek balafirên barhilgir ên leşkerî yên ku behsa wan tê kirin rasterast ji baregeha leşkerî ya Fort Bliss li Texas, Emrîkayê rabûne.

Di heman demê de bi vê trafîka giran a sewqiyatên leşkerî re, hate ragihandin ku balafirên veguhastinê ji bo baregehên leşkerî yên Amerîkî li Urdun, Erebistana Siûdî û Qeterê jî hatine şandin.

Pispor bawer dikin ku armanca sereke ya vê trafîka hewayî, ku li seranserê herêmê belav dibe, xurtkirina tora parastinê ye.

Li gorî agahiyan, Emrîka û rejîma sîyonîst amadekariyên xwe yên leşkerî ji bo êrîşeke muhtemel a li ser Îranê didomînin.

Karbidestekî payebilind ê sîyonîst, li ser vê mijarê ji Kan Channel re şîrove kir û diyar kir ku niha di derbarê operasyonekê de biryarek dawî tune ye.

Karbidest diyar kir ku her du rêveberiyan ev gav avêtine da ku ji bo hemî biryar û fermanên gengaz ên ku Donald Trump dikare bide amade bin.

Li gorî raporeke rojnameya Wall Street Journal, Emrîkayê ji bo ku parastina xwe ya hewayî li Rojhilata Navîn herî zêde bike, ji Teksasê sîstemeke parastina hewayî ya Patriot a zêdetir li herêmê bi cih kiriye. (ÎLKHA)