Di navbera Tirkîye, Qeter, Pakistan û Endonezyayê de Peymana Zebtê ya bi navê "Bedr"ku tê de hilberîna hevbeş, lêkolîn û pêşvebirin û perwerdehiya teknîkî di pîşesaziya parastinê de cih digire hate îmzekirin.

Peymana ku li Dohaya paytexta Qeterê hate îmzekirin, armanc dike ku şiyanên hilberîna leşkerî yên çar welatan zêde bike û hevkariya di pîşesaziya parastinê de xurt bike.

Peymana Bedrê di navbera Wezareta Parastinê ya Dewleta Qeterê, Wezareta Parastinê ya Endonezyayê, Wezareta Parastinê ya Pakistanê û Wezareta Parastina Neteweyî ya Tirkîyeyê de hat îmzekirin.

Peyman ji aliyê Alîkarê Serokwezîrê Qeterê û Wezîrê Dewletê yê Karûbarên Parastinê Şêx Seûd bin Abdulrehman bin Hesen El Sanî; Alîkarê Wezîrê Parastinê yê Endonezyayê Yusuf Jauharî; Wezîrê Parastinê yê Pakistanê Xewaca Muhammed Asif û Wezîrê Parastinê yê Neteweyî yê Tirkîyeyê Yaşar Guler ve hat îmzekirin.

Armanca peymanê ew e ku di warê hilberîna leşkerî de xebata hevbeş were kirin, şiyanên parastinê yên welatan werin baştirkirin û parvekirina zanîna teknîkî zêde bibe.

Armanca pêşvebirina teknolojiyê û hilberînê ya hevbeş

Armanca peymanê ew e ku têkiliyên di pîşesaziya parastinê de di navbera çar welatan de xurt bike û rê li ber projeyên lêkolîn û pêşveçûnê yên hevbeş veke. Perwerdehiya leşkerî ya teknîkî, parvekirina pisporiya endezyariyê û pêşxistina pergalên parastinê jî di nav mijarên sereke yên hevkariyê de ne.

Peyman hevkariyê di warên wekî hilberîna hevbeş a pêkhateyên taybetî yên berhemên pîşesaziya parastinê, perwerdekirina personelên teknîkî, û pêşxistina teknolojiyên nû de, li gorî hewcedarî û şiyanên teknîkî yên aliyan, pêşbînî dike.

Tê texmînkirin ku peyman bi awayekî temamker beşdarî nirxandina kapasîteyên hilberînê yên welatan û pêşxistina çareseriyan ji bo pêdiviyên parastinê yên welatên dost bibe.

Hevkariyên heyî yên Tirkîyeyê girîng in

Tirkiye û Qeter bi rêya modelên veberhênan û hilberînê yên hevbeş di warê pîşesaziya parastinê de hevkariyek pêş dixin. Pakistan û Tirkîye her wiha bi rêya gelek projeyên parastinê têkiliyên xwe didomînin.

Di navbera Tirkîye û Endonezyayê de, projeyên pîşesaziya parastinê yên wekî balafira şer a neteweyî KAAN, tanka navîn KAPLAN MT û mûşeka dijî-keştî ya ATMACA balkêş in.

Peymana ku di navbera çar welatan de hatiye îmzekirin armanc dike ku di çarçoveya hevkariya piralî de beşdarî pêşxistina têkiliyên dualî yên heyî bibe. Tê texmînkirin ku gavên ku di warên hilberîna hevbeş, veguhastina teknolojiyê, lêkolîn û pêşvebirin û perwerdehiya teknîkî de werin avêtin, beşdarî kapasîteyên pîşesaziya parastinê yên aliyan bibin. (ÎLKHA)