44 aktîvîstan di çarçoveya teşebûsa ku bi navê “Fîloya Berxwedanê” ve têlidarxistin, hazirîyên xwe yên ji bo gihandina alîkarîyê ji bo Xezzeyê û şikandina dorpêçê temam kirin. Fîlo wê ewil bighêje Barcelonayê.

Komîteya amadekar a "Fîloya Berxwedanê" ragihand ku beşdarvan ji bo hemû îhtîmalan perwerde dibin û xwe amade dikin. Fîlo wê sibê ji Spanyayê derkeve.

Aktîvîstên vê înîsiyatîfê bang li civaka cîhanî û hikûmetan kirin ku zextê li ser rejîma sîyonîst bikin, heta ku rê bidin wan ji bona ku bigihîjin Xezzeyê. Berdevkê komîteyê roja Înê got ku aktîvîstan ji 44 welatan ew ê beşdarî fîloya keştîyê bibin û ew piştgiriya rayedarên Spanyayê ya ji bo Xezzeyê teqdîr dikin.

Beşdaran ji bo hemû senaryoyên muhtemel perwerde dîtin, ku ev yek ji ber ku artêşa rejîma sîyonîst berê êrîşî keştîyên ku hewl didan dorpêçê li avên navneteweyî bişkînin kiriye gelek girîng e.

Di nav fîloyê de aktîvîstên Swêdî Greta Thunberg û siyasetmedara çepgir a Portekîzî Mariana Mortgaua hene, ku di meha Hezîranê de hewl dan bi keştiya Madleenê bigihîjin Xezzeyê. Seif Ebû Kishk ê Filistînî, yek ji organîzatorên fîloyê, bal kişand ku lazim e ku siyasetmedar zextê li ser rejîma sîyonîst bikin.

Wî got, "Lazim e ew ji bo parastina mafên xwe yên mirovan û garantîkirina derbasbûna ewle ya vê fîloyê mudaxele bikin"

"Filoya Berxwedanê" mezintirîn operasyona deryayî ye ji bo şikandina dorpêça Xezzeyê û ji nêzîkî 70 keştiyan pêk tê. Filo wê di 31ê Tebaxê de ji Barcelonayê û di 4ê Îlonê de ji Tunisê bi rê bikeve.

Ev fîlo komên navneteweyî yên wekî "Tevgera Cîhanî ya Xezzeyê", "Aktîvîstên Fîloya Azadiyê", "Fîloya Berxwedana Mexrîbê" û "Fîlloya Înîsiyatîfa Rojhilat-Asyayê" tîne cem hev.

Organîzator bal dikşînin ku armanca vê înîsiyatîfa gerdûnî şikandina dorpêça neheq a li ser Xezzeyê, beşdarkirina mirovên li çaraliyê cîhanê di çalakiyên rasterast de, balkişandina ser doza Filistînê, eşkerekirina komkujiyên li Xezzeyê û radestkirina alîkariya mirovî ya sembolîk e.

Rejîma sîyonîst, bi piştgiriya Emrîkayê, ji Cotmeha 2023an vir ve li dijî sivîlên Xezzeyê bi karanîna rêbazên kuştin, birçîbûn, wêrankirin û koçberkirina bi darê zorê şerekî qirkirinê dimeşîne. Digel bangewaziyên navneteweyî û biryarên Dadgeha Navneteweyî ya Edaletê, şer berdewam dike.

Li gorî rapora dawî ya Wezareta Tenduristiyê ya Xezzeyê, di şer de zêdetirî 63 hezar kes şehîd bûn û 159 hezar kes jî birîndar bûn. 322 Filistînî, ku 121 ji wan zarok bûn, ji ber birçîbûnê canê xwe ji dest dan. (ÎLKHA)